ខេត្តកំពង់ចាម ៖ ការចុះបង្ក្រាបបទល្មើសនេសាទខុសច្បាប់ លូស្បៃមុង រ៉ាវ របាំងព្រួលធ្វើឡើងនៅចំណុចបឹងB6 ស្ថិតក្នុងស្រុកកងមាស ខេត្តកំពង់ចាម ដោយកម្លាំងអធិការ ដ្ឋាននគរបាលស្រុកកងមាស សហការជាមួយប៉ុស្តិ៍នគរបាលរដ្ឋបាលអង្គរបានខ្ចៅរកាអារ និងក្រុមប្រឹក្សាឃុំខ្ចៅ ។
នៅថ្ងៃទី៥ ខែសីហា ឆ្នាំ២០១៨ កម្លាំងជំនាញអធិការដ្ឋាននគរបាលស្រុកកងមាស សហការជាមួយប៉ុស្តិ៍នគរបាលរដ្ឋបាលអង្គរបាន ខ្ចៅ រកាអារ ក្រុមប្រឹក្សាឃុំខ្ចៅ និងប្រជាពលរដ្ឋចុះបង្ក្រាបបទល្មើសនេសាទខុសច្បាប់ចំណុចបឹងB៦ ស្រុកកងមាស ខេត្តកំពង់ចាម ជាលទ្ធផលសមត្ថកិច្ចយើងបង្ក្រាបបាន លូស្បៃមុងចំនួន២៧មាត់ រ៉ាវចំនួន២៨មាត់ របាំងព្រួលចំនួន១.៦៥០ម៉ែត្រ និងលែងកូនត្រីចូលក្នុងបឹងធម្មជាតិវិញ ចំនួនប្រហែល៥២០គីឡូក្រាម ។
លោកអធិការអះអាងថា ករណីបង្ក្រាបនេះ តាមបញ្ជារបស់ព្រះរាជអាជ្ញាសាលាដំបូងខេត្តកំពង់ចាម សមត្ថកិច្ចបង្កើតគណៈកម្មការ ដុតបំផ្លាញឧបករណ៍នេសាទខុសច្បាប់ខាងលើចោល នៅជាប់មាត់បឹងខាងជើងវត្តរកាអារ ស្ថិតនៅក្នុងភូមិរកាអារ ឃុំរកាអារ ស្រុកកងមាស ៕ ដោយ ៖ បញ្ញាស័ក្តិ
