ភ្នំពេញ ៖ អភិបាលនៃគណៈអភិបាលរាជធានីភ្នំពេញលោកឃួង ស្រេង បានលើកឡើងថា ប្រទេសកម្ពុជា ជាកោះសន្តិភាពនិងជាដីមាសសម្រាប់ការវិនិយោគ ដូច្នេះទេ លោកសូមអោយអ្នកវិនិយោគទាំងអស់ចូលរួមវិនិយោគបន្ថែមទៀត ។ជាងនេះទៅទៀត សម្រាប់កម្ពុជា អ្នកវិនិយោគទាំងអស់ ក៏ត្រូវបានការពារដោយច្បាប់ផងដែរ ។
ការលើកឡើងរបស់លោកអភិបាលរាជធានីភ្នំពេញបែបនេះបានធ្វើឡើងកាលពីថ្ងៃទី៥ សីហា ២០១៨ក្នុងឱកាសដែលលោកបានអញ្ជើញជាអធិបតីភាព បើកសម្ពោធគំរោងលក់អភិវឌ្ឍន៏លំនៅដ្ឋាន ក្រុមហ៊ុនអចលនៈទ្រព្យលីងណាន ហ្គាដិនរបស់ប្រទេសចិនដែលមានទីតាំងស្ថិតនៅតាមបណ្តោយមហាវិថីសម្តេចតេជោហ៊ុនសែន ក្នុងសង្កាត់ចាក់អង្រែលើ ខណ្ឌមានជ័យ ។
លោកឃួង ស្រេង អភិបាលនៃគណៈអភិបាលរាជធានីភ្នំពេញបានអបអរសាទរចំពោះគំរោងវិនិយោគនេះ ដែលបានឆ្លុះបញ្ចាំងឲ្យឃើញនូវភាពជោគជ័យថ្មី១ទៀត នៃការអនុវត្តគោលនយោបាយរបស់រាជរដ្ឋាភិបាលកម្ពុជា ដែលខិតខំទាក់ទាញការវិយោគទាំងក្នុងនិងក្រៅប្រទេស ពិសេសគឺការខិតខំបង្កើនទំនុកចិត្ត និងជំនឿជឿជាក់ជូនដល់វិនិយោគិន។ នេះជាការសម្រេចចិត្តដ៏ត្រឹមត្រូវរបស់ក្រុមហ៊ុនលីងណាន ដែលបានបណ្តាក់ទុនវិនិយោគក្នុងទំហំទឹកប្រាក់ដ៏ច្រើនសន្ធឹកសន្ធាប់ ក្នុងវិស័យឧស្សាហកម្មសំណង់ និងការអភិវឌ្ឍផ្នែកអចលនទ្រព្យនៅរាជធានីភ្នំពេញ ក្នុងគំរោងអភិវឌ្ឍន៏អគារមជ្ឈមណ្ឌលលំនៅដ្ឋានចម្រុះ។
លោកអភិបាលបានថ្លែងថា កម្ពុជា គឺពិតជាទឹកដីមាសសក្ត័សមបំផុតសម្រាប់ធ្វើការវិនិយោគ ដូច្នេះអ្នកវិនិយោគក៏ត្រូវចាប់យកឱកាសនេះឲ្យបាន។
លោកឃួង ស្រេង មានប្រសាសន៍ថា នៅកម្ពុជាមានសម្តេចអគ្គមហាសេនាបតីតេជោហ៊ុនសែន ជានាយករដ្ឋមន្ត្រី គឺផលប្រយោជន៏របស់អ្នកវិនិយោគត្រូវបានការពារដោយច្បាប់។ យើងពិតជាមិនដែលឃើញក្រុមហ៊ុនណាដាក់ទុនវិនិយោគ ក្នុងប្រទេសដែលមានសង្គ្រាមនោះទេ។ សម្រាប់ប្រជាជនកម្ពុជាពិតជាមានមោទនភាព ដែលមានបុរសខ្លាំងដឹកនាំប្រទេសកម្ពុជាឆ្ពោះទៅរកការអភិវឌ្ឍ គឺសម្តេចអគ្គមហាសេនាបតីតេជោហ៊ុនសែន។ កាលពី៥ឆ្នាំមុនក្រោយបោះឆ្នោតគឺគ្មានក្រុមហ៊ុនណា មកសម្ពោធគំរោងរបស់ខ្លួននៅកម្ពុជា ក៏ដូចនៅរាជធានីភ្នំពេញនោះដែរ ព្រោះនៅតាមដងផ្លូវពោរពេញទៅដោយបាតុកម្ម កូដកម្មបំផ្លិចបំផ្លាញនិងបង្កអំពើហឹង្សាពីក្រុមអគតិដែលមាននិន្នាការប្រឆាំង។
ដោយឡែកសម្រាប់ឆ្នាំ២០១៨នេះ តំលៃអចលនះទ្រព្យទាំងមុន និងក្រោយការបោះឆ្នោតគឺនៅតែរក្សាស្ថេរភាព និងធ្វើឲ្យអ្នកវិនិយោគកាន់តែមានទំនុកចិត្ត។ឯ លោកអភិបាលលើកឡើងថា៖នេះជាគំរោង១ក្នុងចំណោមគំរោងជាច្រើនដែលបានកើតឡើងដោយមានការគិតគូទុកជាមុន មិនមែនកើតឡើងដោយចៃដន្យនោះទេ។ លោក ឃួង ស្រេង បានលើកឡើងថា ភាគខាងត្បូងរាជធានីភ្នំពេញ ជាតំបន់ប្រកប ដោយសក្តានុពលខ្ពស់ ហុមព័ទ្ធ ទៅដល់មជ្ឈមណ្ឌលពាណិជ្ជកម្ម លំនៅឋានប្រណី និងជាតំបន់ប្រមូលផ្តុំ ទៅដោយឧទ្យានបុរី ប្រកដោយប្រណីតភាព៕ ដោយ ៖ កូឡាប