ប៉ូលិសអាមេរិក ទើបប្រកាសតួលេខឯកទគ្គកម្ម ៖ មនុស្ស៤៤នាក់ រងការបាញ់ប្រហារ ក្នុងនោះ៥នាក់ បានស្លាប់ក្នុងឆាកប្រយុទ្ធរយៈពេល ១៤ម៉ោង នៅ Chicago កាលពីថ្ងៃទី ៥ ខែសីហា ម្សិលម៉ិញនេះ ។
CNN ដែលដកស្រង់ព័ត៌មានពីប៉ូលិសទីក្រុងឲ្យដឹងថា ក្នុងរយៈពេល ៣ម៉ោងដំបូង ចាប់ពីម៉ោង ១និង៣០នាទី មានមនុស្សដល់ទៅ៣០នាក់ ត្រូវបាញ់ ហើយ ២នាក់ បានស្លាប់ក្នុងការបាញ់ប្រហារចំនួន ១០ករណី ។
ប៉ូលិសកំពុងស៊ើបអង្កេតរថយន្តមួយគ្រឿងត្រូវដុតទាក់ទិនដល់ករណីផ្ទុះអាវុធថ្ងៃទី៥ ខែសីហា ។
លោក Fred Waller មេដឹកនាំប៉ូលិសល្បាតរបស់ទីក្រុងពោលថា ៖ “ទីក្រុង Chicago ទើបឆ្លងកាត់រាត្រីហិង្សាមួយ ហើយករណីមួយចំនួនទាក់ទងដល់ជម្លោះក្រុមបក្សសង្គមងងឹត” ។
តាមលោក Waller យ៉ាងតិចមានករណីមួយ ដែលបណ្តាខ្មាន់កាំភ្លើងបានបាញ់ប្រហារលើពិធីជប់លៀងមួយលើដងវិថី ។ ឯកសារប៉ូលិសបង្ហាញថា អ្នករងរបួសរួមមានមនុស្សចំណាស់បំផុត អាយុ ៦១ឆ្នា ហើយក្មេងបំផុតគឺ ១១ឆ្នាំ ។
មុននោះកាលពីថ្ងៃសុក្រ ទី ៣ ខែសីហា មានករណីផ្ទុះអាវុធចំនួន៦ តែសំណាងល្អពុំមានអ្នកស្លាប់ ។ ថ្ងៃសៅរ៍កើតឡើងករណីផ្ទុះអាវុធ ១៥រឿង មានស្លាប់ ១នាក់ ។
ថ្ងៃអាទិត្យ បណ្តាករណីផ្ទុះអាវុធ កើតឡើងពេលរំលងអាធ្រាត ដល់ម៉ោង ២ល្ងាច ។
នេះជាតួលេខឯកទគ្គកម្ម ខណៈពេលដែលនៅអាមេរិក កំពុងមានជម្លោះតឹងតែងជុំវិញសំណូមពររឹតបន្តឹងអាវុធ ៕ លីសា
