រៀងរាល់ថ្ងៃលោក Wu Tianxi តែងយកម្តាយចាស់ជរា ធ្វើដំណើរទៅកាន់កន្លែងធ្វើការរបស់ខ្លួនអស់កាល ៣ឆ្នាំ មកហើយ គ្មានបាត់១ថ្ងៃណាឡើយ ។
លោក Wu Tianxi ជាបុគ្គលិករបស់ក្រុមហ៊ុនស្ពានថ្នល់ Jiuyi ។ កន្លែងធ្វើការរបស់លោកនៅប្រជុំជន Xiangshui ស្រុក Dafang ចម្ងាយពីផ្ទះលោក Wu នៅ ជីជឺវ ជាង ៣០ km ។
រៀងរាល់ព្រឹកព្រលឹមលោកក្រោកពីម៉ោង ៥ព្រឹក សំអាតខ្លួនស្លៀកពាក់លុបមុខ ដុសធ្មេញឲ្យម្តាយ ដែលមានវ័យ ៩៣ឆ្នាំ ហើយមានជំងឺបាត់ការចងចាំ (Alzheimer) តាំងពី ៣ឆ្នាំមុន ។
ជំងឺនេះកាន់តែធ្ងន់ធ្ងរទៅៗ រហូតដល់ពេលនេះ សូម្បីកូនរបស់ខ្លួនក៏គាត់លែងស្គាល់ ។
លោក Wu Tianxi នាំយកម្តាយទៅធ្វើការជាមួយ ។
លោកតែងចែករំលែកថា ៖ “ខ្ញុំនឹងបារម្ភពីម្តាយខ្ញុំច្រើនណាស់ ប្រសិនបើទុកឲ្យគាត់នៅផ្ទះម្នាក់ឯង ហើយគ្មានអ្នកមើលថែនោះ ។ ខ្ញុំមានអារម្មណ៍ស្ងប់ជាង ប្រសិនបើយកគាត់ទៅធ្វើការជាមួយ មានពេលមើលថែគាត់…” ។
ស្ត្រីជាម្តាយក្នុងវ័យជរាទៅហើយនោះ ក៏បានដើរលេងក្នុងទីលាននៅកន្លែងលោក Wu ធ្វើការ ។ ថ្វីបើគាត់ពុំចាំកូនក្តី តែតែងដើររកតាមបែបសភាវៈ ។ កម្មករនៅទីនោះពិតជាកោតសរសើរ Wu ដែលចេះមើលថែម្តាយបានយ៉ាងប៉ិនប្រសប់ ។
Long Heyun ដែលជាមិត្តភក្តិរបស់ Wu ពោលថា ៖ ៣ឆ្នាំមកហើយ Wu បានថែទាំម្តាយរបស់គាត់ ហើយថែមទាំងត្រូវធ្វើការឆ្ងាយបែបនេះ ។ វាពុំមែនជាការងាយស្រួលសោះឡើយៗ” ។
ការរវល់មើលថែម្តាយ ធ្វើឲ្យ Wu ពុំដែលមានពេលវេលាសម្រាប់លេងកម្សាន្តជាមួយមិត្តភក្តិទេ តែលោកពុំខ្វល់ខ្វាយឡើយ ។ Wu ពោល ៖ “ម្តាយរបស់ខ្ញុំបានធ្វើការយ៉ាងលំបាកដើម្បីចិញ្ចឹមខ្ញុំ និងបងប្អូនខ្ញុំ ។ គាត់ពុំចង់ក្លាយជាអម្រែកដល់ពួកខ្ញុំពេលគាត់ចាស់ទេ ។ តែឥឡូវគាត់ពុំអាចមើលថែខ្លួនឯងបាន ខ្ញុំចង់នៅក្បែរគាត់… ។ លោកពោលបន្ត ៖ ពុំសល់ពេលវេលាច្រើនទេ គាត់អាយុ ៩៣ឆ្នាំហើយ ។ ខ្ញុំបន់ស្រន់ឲ្យគាត់មាំមួន អាយុវែង ដើម្បីខ្ញុំអាចទទួលភាពកក់ក្តៅពីគាត់ ការស្រឡាញ់របស់គាត់…៕ ចន្ទ្រា
