ខេត្តព្រះសីហនុ ៖ អាជ្ញាធរស្ថាប័នពាក់ព័ន្ធ នៃរដ្ឋបាលខេត្តព្រះសីហនុ បានអំពាវនាវដល់ប្រជានេសាទ និងម្ចាស់ទូក ឬអូរប័រដឹកភ្ញៀវទេសចរទាំងអស់ ឲ្យប្រុងប្រយ័ត្នពីសុវត្ថិភាព ក្នុងការចេញទូកធ្វើដំណើរតាមផ្លូវសមុទ្រ ព្រោះស្ថានភាពអាកាសធាតុនៅលើលំហសមុទ្រខេត្តនេះ កំពុងមានភ្លៀងធ្លាក់ ខ្យល់បោកបក់ និងមានរលកសមុទ្រធំៗ។
មន្ត្រីរដ្ឋបាលខេត្តព្រះសីហនុ បានឲ្យដឹងថា នៅថ្ងៃទី៦ ខែសីហា ឆ្នាំ២០១៨នេះ ស្ថានភាពធាតុអាកាស ហាក់មិនសូវល្អទេ ព្រោះមានភ្លៀង និងខ្យល់បោកបក់ខ្លាំង ជាពិសេសនៅលើលំហសមុទ្រមានរលកធំៗ។
ផ្តើមពីបញ្ហានេះ លោកឧកញ៉ា ទៀ វិចិត្រ ប្រធានសមាគមទូកទេសចរណ៍ខេត្តព្រះសីហនុ មានប្រសាសន៍ថា ដោយសារតែស្ថានភាពអាកាសនៅលើលំហសមុទ្រខេត្តព្រះសីហនុ មិនសូវអំណោយផលបែបនេះ ខាងសមាគមក៏បានជូនដំណឹងដល់ម្ចាស់ក្រុមហ៊ុនទូកទេសចរណ៍ទាំងអស់ ឲ្យបង្កើនការប្រុងប្រយ័ត្ន និងត្រូវស្តាប់តាមការបញ្ជាចរាចរណ៍ផ្លូវសមុទ្រ របស់កម្លាំងសមត្ថកិច្ចនគរបាល ដែលប្រចាំការនៅតាមផែទូកនីមួយៗ ដើម្បីជៀសវាងកើតមានគ្រោះថ្នាក់នៅលើលំហសមុទ្រ ជាយថាហេតុណាមួយកើតឡើង។
ត្រង់ចំណុចនេះ មន្ត្រីរដ្ឋបាលខេត្តព្រះសីហនុ បានបញ្ជាក់ថា កម្លាំងសមត្ថកិច្ចចម្រុះរួមមាន៖ កម្លាំងនគរបាល – កងរាជអាវុធហត្ថ និងកម្លាំងសមត្ថកិច្ចអង្គភាពបង្ក្រាបបទល្មើសលើលំហសមុទ្រជាដើម បានដាក់ឲ្យប្រចាំការតាមកំពង់ផែទូកទេសចរណ៍នានានៅខេត្តព្រះសីហនុ ដើម្បីត្រួតពិនិត្យបច្ចេកទេសផ្ទុក ឬដឹកមនុស្សចេញចូល របស់ទូកទេសចរណ៍នៅតាមផែនីមួយៗ ដោយយកចិត្តទុកដាក់ ប្រយោជន៍ជួយការពារសុវត្ថិភាពធ្វើដំណើរ ជូនប្រជាពលរដ្ឋ ឲ្យមានសុវត្ថិភាព។
កម្លាំងនគរបាលចរាចរណ៍ផ្លូវសមុទ្រ ឲ្យដឹងថា បញ្ហាអាកាសធាតុនេះ ប្រសិនបើពេលមានព្យុះភ្លៀង និងរលកសមុទ្របោកបក់ខ្លាំង សមត្ថកិច្ចនឹងផ្អាកការធ្វើចរាចរណ៍ទូកដឹកអ្នកដំណើរជាបណ្តោះអាសន្ន ដោយរង់ចាំឲ្យអាកាសធាតុមកសភាពស្ងប់ស្ងៀម ទើបបើកឲ្យដំណើរការឡើងវិញ។
យ៉ាងនេះក្តី មន្ត្រីនគរបាលប្រចាំការ នៅផែទូកទេសចរណ៍ឆ្នេរអូរឈើទាល ក្រុងព្រះសីហនុ បានឲ្យដឹងថា រាល់ការធ្វើចរាចរាណ៍ចេញចូល របស់ទូកទេសចរណ៍ នៅថ្ងៃច័ន្ទ ទី៦ ខែសីហា ឆ្នាំ២០១៨នេះ គឺនៅបន្តបើកឲ្យដំណើរការជាធម្មតា ដោយគ្រាន់តែសមត្ថកិច្ច បានបង្កើនសកម្មភាពចុះត្រួតពិនិត្យបច្ចេកទេសទូក និងការផ្ទុកចំនួនអ្នកធ្វើដំណើរ ឧបករណ៍ ឬសម្ភារៈសង្គ្រោះ នៅលើទូកនីមួយៗ ឲ្យបានត្រឹមត្រូវ មុននឹងអនុញ្ញាតឲ្យទូកទាំងនោះចាកចេញពីផែ៕ ដែន សីមា
