អាវុធយោធាដែលរួមមាន កាំភ្លើង ដាវនិងគ្រាប់បែកប្រមាណ៣០០០ ត្រូវបានរកឃើញនៅក្រោមដីនាសាលាបឋមសិក្សាមួយ នៅតូក្យូ។
កាលពីខែមុន ក្រុមកម្មករសំណង់បានរកឃើញអាវុធដែលបន្សល់ទុកតាំងពីសម័យសង្គ្រាមលោកលើកទី២ នៅពេលដែលគេកំពុងជីកគ្រឹះក្នុងទីលានសាលាបឋមសិក្សាTanashi ភាគខាងលិចរដ្ឋធានីតូក្យូដើម្បីសាងសង់ឃ្លាំង-នេះបើតាមAFP។
ចំនួនអាវុធដែលត្រូវបានរកឃើញក្នុងជម្រៅ1-2 m ក្រោមដី រួមមានកាំភ្លើង១៤០០ដើម ដាវ១២០០ដើម គ្រាប់បែក៨គ្រាប់ និងគ្រាប់កាំភ្លើង៣០២គ្រាប់ ។តាមមន្ដ្រីប្រចាំតំបន់ឱ្យដឹងថា ចំនួនអាវុធទាំងនេះសុទ្ធសឹងបានច្រែះចាប់និងពុំអាចប្រើប្រាស់ បានទៀតទេ។
កាលពីខែសីហាឆ្នាំទៅ គ្រាប់បែក១គ្រាប់ត្រូវបានគេរកឃើញនៅតំបន់រោងចក្រអគ្គិសនីនុយក្លេអ៊ែរFukushima ដែលបន្សល់ទុកពីសម័យសង្គ្រាមលោកលើកទី២ ហើយនៅខែមករាឆ្នាំនេះគេក៏បានរកឃើញគ្រាប់បែកដូចគ្នា១គ្រាប់ទៀត នៅខេត្តOkinawa។
៧០ឆ្នាំហើយដែលសង្គ្រាមត្រូវបានបញ្ចប់ ប៉ុន្ដែម្ដងម្កាលជប៉ុននៅតែរកឃើញគ្រាប់បែកដែលមិនទាន់ផ្ទុះ ប៉ុន្ដែគេកម្រប្រទះឃើញនូវបរិមាណអាវុធច្រើនដូចលើកនេះឡើយ៕
សូយន