ប្រធានក្រុមហោះហើរនៃក្រុមហ៊ុនអាកាសចរណ៍ធំបំផុតអឺរ៉ុប ត្រូវបានរកឃើញថាស្លាប់នៅក្នុងរថយន្ដ នាកន្លែងចតរថយន្ដសម្រាប់បុគ្គលិកនៅព្រលានយន្ដហោះ។
បណ្ដាបុគ្គលិកនៃក្រុមហ៊ុន Ryanair Ireland មានអារម្មណ៍មិនប្រក្រតីពេលដែលពុំឃើញប្រធានក្រុមហោះហើរ Jouke Schrale, អាយុ៤៥ឆ្នាំ រាយការណ៍អំពីជើងហោះហើរឆ្ងាយមួយដូចទម្លាប់ធម្មតានៅថ្ងៃទី៣ ខែសីហា ។
ក្រោយមកគេបានរកឃើញ Schrale បានស្លាប់នៅក្នុងរថយន្ដ ហើយតាមការសន្និដ្ឋានគាត់បានធ្វើអត្តឃាត។
ជើងហោះហើរដែលត្រូវចេញដំណើរនៅម៉ោង៨និង៣០នាទីពីMalaga ទៅកាន់Brussels, ប្រទេសបែលហ្សិកត្រូវពន្យារពេលប៉ុន្មានម៉ោងដើម្បីរៀចបំអ្នកបើកបរជំនួស។
អ្នករួមអាជីពរបស់លោកសុទ្ធសឹងតក់ស្លុតយ៉ាងខ្លាំង។ Schrale សញ្ជាតិហូឡង់ ធ្វើការឱ្យក្រុមហ៊ុនអាកាសចរណ៍ធំបំផុតទ្វីបអឺរ៉ុបនេះបាន១០ឆ្នាំហើយ។ គាត់រស់នៅជាមួយភរិយានាប្រទេសអេស្ប៉ាញ។
គួររម្លឹកថា អ្នកបើកបរនិងបម្រើការនៅក្រុមហ៊ុននេះទើបតែធ្វើកុបកម្មដើម្បីប្រឆាំងនឹងលក្ខខណ្ឌការងារ ព្រមទាំងសម្ពាធ ពេលវេលាធ្វើការច្រើនពេក។កាលពីឆ្នាំ២០១៧ ក្រុមហ៊ុននេះត្រូវលុបចោលជើងហោះហើររាប់ពាន់ ព្រោះតែអ្នកបើកបរជាច្រើនសុំលាឈប់ពីការងារ៕សូយន