បាត់ដំបង ៖ ដោយសារមានទំនាស់ពាក្យសម្ដី រឿងប៉ះពារខូចឡាន ជនសង្ស័យឲ្យ ជនរងគ្រោះ សងថ្លៃរថយន្តដឹកទឹកកក ប៉ះខូចឡាន ហើយជនរងគ្រោះ ប្រកែកមិនសង ទើបជនល្មើស បានទាញកាំភ្លើងខ្លី បាញ់អ្នកបើកឡានដឹកទឹកកក ស្លាប់ម្នាក់ ។ រហូតមកដល់ថ្ងៃទី៧ខែសីហានេះ សមត្ថកិច្ចមិនទាន់ចាប់បានឃាតករដៃឆៅទាំង២នាក់នោះ នៅឡើយទេ។
សូមបញ្ជាក់ថា នៅថ្ងៃទី៥ ខែសីហា ឆ្នាំ២០១៨ វេលាម៉ោង ២២ នៅចំណុចវាលអន្ទង់ស ភូមិក្រពើជើង ឃុំភ្នំសំពៅ ស្រុកបាណន់ មានករណីមនុស្សឃាតដោយចេតនា បង្កដោយជនសង្ស័យចំនួន ២នាក់មិនស្គាល់អត្តសញ្ញាណ បើករថយន្តម៉ាកហាយឡែនឌ័រមិនចាំស្លាកលេខ ១គ្រឿង មកឈប់មុខរថយន្តដឹកទឹកកក ១គ្រឿង។
លោកវរសេនីយ៍ឯក ប៉ាន់ វ៉ាន់នី អធិការនគរបាលស្រុកបាណន់ បានឲ្យដឹងថា ជនរងគ្រោះមានគ្នា ៣នាក់ជិះរថយន្តដឹកទឹកកក គឺទី១.ឈ្មោះ ពេជ្រ ភិសា ភេទប្រុស អាយុ ២៥ឆ្នាំ ជាអ្នកបើកបរ (ស្លាប់) ទី២.ឈ្មោះ ហេង ឡិច ភេទប្រុស អាយុ ២០ឆ្នាំ និង៣.ឈ្មោះ ប៊ូ ចាន្ធី ភេទប្រុស អាយុ ២៧ឆ្នាំ អ្នកទាំងបីមានទីលំនៅភូមិតាង៉ែន ឃុំតាគ្រាម ស្រុកបាណន់។
ជនសង្ស័យបានប្រើកាំភ្លើងខ្លី បាញ់សំដៅជនរងគ្រោះ នៅលើឡានបណ្ដាលឲ្យរងរបួសធ្ងន់ ហើយត្រូវបានស្លាប់ នៅតាមផ្លូវដឹកទៅសង្គ្រោះនៅមន្ទីរពេទ្យ។
លោកវរសេនីយ៍ឯក បានបញ្ជាក់ថា មូលហេតុនៃករណីនេះ គឺបណ្តាលមកពីទំនាស់ពាក្យសម្ដី នឹងគ្នា ក្នុងករណីគ្រោះថ្នាក់ចរាចរ បើករថយន្តប៉ះគ្នា ហើយជនសង្ស័យ ឲ្យសងថ្លៃរថយន្តដឹកទឹកកកប៉ះពារខូចឡាន ជនរងគ្រោះប្រកែកមិនសង ទើបជនសង្ស័យទាញកាំភ្លើងបាញ់សម្លាប់តែម្តង។ ករណីនេះ សមត្ថកិច្ចជំនាញ កំពុងត្រួតពិនិត្យកន្លែងកើតហេតុ និងធ្វើការស្រាវជ្រាវរកមុខជនសង្ស័យ ដើម្បីចាត់ការបន្តតាមនីតិវិធីច្បាប់៕ ដោយ ៖ បញ្ញាស័ក្តិ
