ភ្នំពេញ ៖ អាជ្ញាធរមីន បានផ្សព្វផ្សាយលើផេកហ្វេសប៊ុកថា លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានទទួលជួប លោកស្រី Elizabeth McGarva ទីប្រឹក្សាជាន់ខ្ពស់គម្រោង DFID ចក្រភពអង់គ្លេស ដើម្បីពិភាក្សាការងារមួយចំនួនពាក់ព័ន្ធ នឹងការផ្តល់ថវិកាជំនួយនៅថ្ងៃចន្ទ ទី៦ ខែសីហា ឆ្នាំ២០១៨ នៅអគ្គលេខាធិការដ្ឋានអាជ្ញាធរមីន ។
លោកស្រី Elizabeth បានបញ្ជាក់ថា គម្រោងនឹងបន្តគាំទ្រដល់ប្រតិបត្តិករ NPA HALO និង MAG រហូតដល់ឆ្នាំ២០២០ លើការបោសសម្អាតផ្ទៃដីគ្រោះថ្នាក់ ការអប់រំយល់ដឹងពីមីន ការលើកកម្ពស់ប្រព័ន្ធព័ត៌មានវិស័យមីន និងការបង្កើនសមត្ថភាព។
លោកស្រី Elizabeth បានបញ្ជាក់ថា គម្រោងនឹងអប់រំផ្សព្វផ្សាយយល់ដឹងអំពីមីន និងការផ្តល់នូវការអប់រំបណ្តុះបណ្តាល ដើម្បីបង្កើនសមត្ថភាពដល់ អង្គភាពពាក់ព័ន្ធនឹងវិស័យសកម្មភាពមីន ជាពិសេសការកសាងសមត្ថភាពបុគ្គលិកបម្រើការក្នុងការិយាល័យគ្រប់គ្រងទិន្ន័យ នៃអង្គភាពអាជ្ញាធរមីន។
លោកទេសរដ្ឋមន្ត្រី បានថ្លែងអំណរគុណដល់គណៈប្រតិភូ ដែលបានបង្ហាញឆន្ទៈក្នុងការបន្តជួយដោះស្រាយបញ្ហាមីន និងសំណល់ជាតិផ្ទុះ សល់ពីសង្គ្រាមនៅកម្ពុជា និងស្នើសុំឲ្យគម្រោងDFID បន្តជំនួយរហូតដល់ឆ្នាំ២០២៥ ដែលស្របតាមយុទ្ធសាស្ត្រជាតិសកម្មភាពមីន។
បើតាមលោកទេសរដ្ឋមន្ដ្រី , រាជរដ្ឋាភិបាល ដែលដឹកនាំដោយសម្តេចតេជោ ហ៊ុន សែន នាយករដ្ឋមន្ត្រី ប្តេជ្ញាចិត្តក្នុងការដោះស្រាយបញ្ហាមីន និងសំណល់ជាតិផ្ទុះសល់ពីសង្គ្រាម ដែលបានធ្វើឲ្យប៉ះពាល់ ដល់ការអភិវឌ្ឍសេដ្ឋកិច្ច សង្គមយ៉ាងខ្លាំងនៅកម្ពុជា និងការងារធំៗមួយចំនួន ដែលអាជ្ញាធរមីនកំពុងតែធ្វើ ដូចជាការបង្កើតយុទ្ធសាស្ត្រគ្មានមីននៅកម្ពុជា ការបង្កើតគណៈកម្មការសម្រាប់ពិនិត្យមើលការអនុវត្ត ផែនការយុទ្ធសាស្ត្រជាតិវិស័យសកម្មភាពមីន២០១៨-២០២៥។
ចំណែកនៅល្ងាចថ្ងៃចន្ទ ថ្ងៃទី៦ ខែសីហា ឆ្នាំ២០១៨ នៅទីបញ្ជាការដ្ឋានស៊ីម៉ាក់ភ្នំពេញ លោកហេង រតនា អគ្គនាយកស៊ីម៉ាក់ បានជួបពិភាក្សាការងារជាមួយលោកស្រី Elizabeth McGarva ទីប្រឹក្សាជាន់ខ្ពស់គម្រោង នៃក្រសួងជំនួយអភិវឌ្ឍន៍អន្តរជាតិ របស់ចក្រភពអង់គ្លេស លើកិច្ចប្រតិបតិ្តការនិងសហការបោសសំអាតមីនមនុស្សធម៌នៅកម្ពុជា។
លោកស្រី Elizabeth បានបញ្ជាក់ថា គម្រោងរបស់រដ្ឋាភិបាលចក្រភពអង់គ្លេស សម្រេចផ្តល់កិច្ចសន្យាផ្តល់ជំនួយ ដល់អង្គការដោះមីន NPA HALO MAG និងGICHD សម្រាប់ធ្វើសកម្មភាពដោះមីនមនុស្សធម៌ នៅកម្ពុជារយៈពេល២ឆ្នាំ គឺ២០១៨-មិនា ២០២០៕ ដោយ ៖ កូឡាប