ខេត្តព្រះវិហារ ៖ ករណីគ្រោះថ្នាក់ចរាចរ រវាងរថយន្ត បុកម៉ូតូ ក្នុងទិសដីបញ្ច្រាសគ្នា បណ្តាលឲ្យនាយទាហ៊ានម្នាក់ បានស្លាប់ភ្លាមៗ នៅនឹងកន្លែងកើតកាលពីវេលាម៉ោង៩ និង៣០នាទីព្រឹក ថ្ងៃទី៦ ខែសីហា ឆ្នាំ២០១៨ ត្រង់ចំណុចទួល៤២ ចន្លោះគីឡូម៉ែត្រលេខ២០៥ និង២០៦ ក្នុងភូមិត្រពាំងសង្កែខាងលិច ឃុំកន្ទួត ស្រុកជាំក្សាន្ត ខេត្តព្រះវិហារ។ រថយន្ត១គ្រឿង បើកវ៉ាម៉ូតូ១គ្រឿង ជ្រុលទៅបុកម៉ូតូចំពីមុខ ។
សមត្ថកិច្ចនគរបាលមូលដ្ឋាន បានឲ្យដឹងថា មុនកើតហេតុរថយន្ត១គ្រឿង ម៉ាកអ៊ីសុយសុយ ពណ៌ស ពាក់ស្លាកលេខ រតនគិរី៣A-០០៨៦ ទិសដៅពីត្បូងទៅជើង ក្នុងល្បឿនលឿន លុះដល់ចំណុចខាងលើ ក៏រេចង្កួតជ្រុលទៅបុកម៉ូតូ១គ្រឿង ម៉ាក់សងកូរេ ពណ៌ក្រហម បើកបញ្ច្រាសទិសគ្នា ចំពីមុខយ៉ាងពេញទំហឹង បណ្ដាលឲ្យជនរងគ្រោះស្លាប់ភ្លាមៗតែម្តង។ ជនរងគ្រោះមានឈ្មោះ ត្រក អឿន ភេទប្រុស អាយុ៥២ឆ្នាំ អត្តលេខ ២២៩៥៩៨ កងអនុសេនាតូចបញ្ជូនសារវរសេនាតូច៣៧២ ចំណុះកងពលតូចអន្តរាគមន៍លេខ៧ ស្ថិតក្នុងភូមិសែនជ័យ ឃុំស្រអែម ស្រុកជាំក្សាន្ត ខេត្តព្រះវិហារ។ ក្រោយពេលបង្កហេតុរួច ម្ចាស់រថយន្ត បើកទ្វាររត់គេចខ្លួនចូលព្រៃបាត់ បន្សល់ទុករថយន្ត នៅនឹងកន្លែងកើតហេតុ។
សមត្ថកិច្ចនគរបាលចរាចរណ៍ ព្រមជាមួយមេអង្គភាព និងអាជ្ញាធរមូលដ្ឋាន បានមកដល់កន្លែងកើតហេតុ ធ្វើការវាស់វែង រួចយករថយន្ត ដឹកសពជនរងគ្រោះទៅធ្វើបុណ្យតាមប្រពៃណី។ រថយន្តបង្ក និងម៉ូតូជនរងគ្រោះ ត្រូវបានសមត្ថកិច្ចនគរបាលចរាចរណ៍ នាំយកទៅរក្សាទុក នៅអធិការដ្ឋាននគរបាលស្រុកជាំក្សាន្ត រង់ចាំសាមីខ្លួនចូលខ្លួនដោះស្រាយនៅពេលក្រោយ៕ ដោយ ៖ បញ្ញាស័ក្តិ
