ខ្មាន់កាំភ្លើងម្នាក់ បានបាញ់សម្លាប់ចៅហ្វាយក្រុង Antonio Halili ដែលកំពុងស្ថិតនៅក្នុងបញ្ជីនៃមន្ត្រីចោទប្រកាន់ទាក់ទងនឹងពួកមនុស្សញៀនគ្រឿងញៀនរបស់លោក Duterte នៅក្នុងអំឡុងពិធីគោរពទង់ជាតិ នៅក្នុងបរិវេណសាលាក្រុង នៅក្បែរ Tanauan កាលពីថ្ងៃច័ន្ទ ។ ហេតុការណ៍នេះបានកើតឡើងបន្ទាប់ខ្មាន់កាំភ្លើងជិះម៉ូតូ បាញ់សម្លាប់សម្ព័ន្ធមិត្តរបស់លោក Duterte លោក Ferdinand Bote ចៅហ្វាយក្រុង General Tinio ភាគខាងជើងហ្វីលីពីន ។
ទោះយ៉ាងណា ទាំងលោក Bote និងលោក Lubigan ចៅហ្វាយក្រុងរង ត្រូវបានបាញ់សម្លាប់កាលពីថ្ងៃសៅរ៍ ដែលត្រូវបានដឹងថាមានជាប់ទាក់ទងនឹងគ្រឿងញៀន ។ ប៉ុន្តែ ពុំទាន់មានហេតុផលច្បាស់លាស់ណាមួយ បញ្ជាក់អំពីករណីបាញ់សម្លាប់មនុស្សយ៉ាងស្រស់ៗបែបនេះនោះទេ ។
អ្នកស៊ើបអង្កេតឃ្លាំមើលសិទ្ធិមនុស្ស លោក Carlos Conde បានថ្លែងថា៖ «អំពើហិង្សាទាក់ទងនឹងការបោះឆ្នោតជាទូទៅបានកើតឡើងពីរបីខែ មុនពេលការបោះឆ្នោតឈានមកដល់» ។
លោក Conde បន្ថែមថា៖ «ការបាញ់សម្លាប់មនុស្សផ្សេងពីគ្នានៅទីនេះ ពិតជាវិធីមួយដែលលោក Duterte បានគំរាមពួកមន្ត្រីជាមួយនឹងការស្លាប់ ហើយបន្ទាប់មក ពួកគេក៏ត្រូវបានសម្លាប់ពី១បន្ត១ ។ រឿងនេះពិតជាពុំមែនជារឿងចៃដន្យនោះទេ» ។
យោងតាមស្ថិតិរបស់ប៉ូលីស នោះមនុស្ស ២៤ នាក់ ត្រូវបានបាញ់សម្លាប់ នៅក្នុង «អំពើហិង្សាទាក់ទងនឹងការបោះឆ្នោត» ក្នុងអំឡុងពេលនៃយុទ្ធនាការបោះឆ្នោតជាតិនៅក្នុងខែឧសភា ឆ្នាំ២០១៦ ។
ចៅហ្វាយក្រុងយ៉ាងតិច ១០ នាក់ ក្នុងនោះរួមមាន៖ លោក Halili និងលោក Bote ត្រូវបានបាញ់សម្លាប់ ចាប់តាំងពីលោក Duterte ឡើងកាន់អំណាច ខណៈលោក Lubigan ដែលជាសមាជិកគណបក្សនយោបាយមួយរូប មានទំនាក់ទំនងជាមួយប្រធានាធិបតី ដែលជាចៅហ្វាយក្រុងរងទី៥ ក៏ត្រូវបានបាញ់សម្លាប់នៅក្នុងអំឡុងពេលនោះ ។
លោក Duterte បានដំណើរការលើប្រព័ន្ធច្បាប់ និងការបញ្ជាផ្ទាល់ ដែលរួមមានការសន្យាសម្លាប់មនុស្សអស់រាប់ពាន់នាក់ ដែលជាប់ពាក់ព័ន្ធនឹងការជួញដូរគ្រឿងញៀន ក្នុងនោះរួមមានមន្ត្រីផងដែរ ។ អាជ្ញាធរបានទទួលស្គាល់ថា ជនសង្ស័ងគ្រឿងញៀនជាង ៤,២០០ នាក់ ត្រូវបានសម្លាប់ ដោយសារតែពួកគេរឹងទទឹងនឹងការចាប់ខ្លួន ប៉ុន្តែ ក្រុមសិទ្ធិមនុស្សនិយាយថា តួលេខពិតប្រាកដនេះយ៉ាងហោចណាស់កើនឡើងទ្វេជា៣ ហើយវាអាចជាចំនួនត្រូវបានចាត់ជាឧក្រិដ្ឋកម្មប្រឆាំងមនុស្សជាតិ ៕ ឧត្តម (liveleak)