ខេត្តព្រះសីហនុ ៖ ប្រជាពលរដ្ឋមួយចំនួនរស់នៅក្រុងព្រះសីហនុ មានចម្ងល់ទៅលើ រយៈពេល នៃការចុះបញ្ជីហ៊ីប៉ូតែក របស់អតិថិជនធនាគារ នៅច្រកចេញចូលតែមួយ របស់សាលាខេត្តព្រះសីហនុ ដែលពីមុនមានរយៈពេល៧ថ្ងៃ ធ្វើការនៅមន្ទីរសុរិយោដី ប៉ុន្តែឥឡូវត្រូវឆ្លងកាត់ទៅច្រកចេញចូល របស់សាលាខេត្តជាមុនសិន ទើបបានវិលត្រលប់មកមន្ទីរសុរិយោដីវិញ ថាមានភាពស្មុគស្មាញ និងប្រើពេលយូរ។
អ្នកគ្រប់គ្រងធនាគាមួយចំនួន ស្ថិតក្នុងក្រុងព្រះសីហនុ បានបង្ហាញទស្សនៈ និងចាត់ទុកថា សេវានៃការចុះបញ្ជីហ៊ីប៉ូតែក ដែលត្រូវឆ្លងកាត់ ច្រកចេញចូលនៅសាលាខេត្ត រួចរុញមកឲ្យមន្ទីរពិនិត្យចុះឡើងៗ ថារឹតតែបង្កការលំបាកដល់អតិថិជន ក៏ដូចវិស័យឯកជនយ៉ាងខ្លាំង។
ផ្តើមពីបញ្ហានេះ ប្រភពពីអ្នកគ្រប់គ្រងធនាគារ និងប្រជាពលរដ្ឋមួយចំនួន រស់នៅក្រុងព្រះសីហនុ បានសំណូមពរ ដល់មន្ត្រីជំនាញ ច្រកចេញចូល នៃរដ្ឋបាលខេត្តព្រះសីហនុ ជួយបំភ្លឺចម្ងល់ ទាក់ទងនីតិវិធី ឬពេលវេលាធ្វើការងារនៅច្រកចេញចូលតែមួយខាងលើនេះផង។
ត្រង់ចំណុចនេះ វិស័យឯកជន និងប្រជាពលរដ្ឋរស់នៅ ខេត្តព្រះសីហនុ សំណូមពរដល់មន្ត្រីជំនាញ ឲ្យជួយបំភ្លឺ ចំពោះចម្ងល់ខាងលើ ជូនវិស័យឯកជន ឬវិស័យធនាគារបានដឹងជាសាធារណៈ ដោយអនុគ្រោះផង។
ជាងនេះទៀត ខាងវិស័យធនាគារ បានអះអាងថា សព្វថ្ងៃនេះ ពួកគាត់បានខឹតខំ ជួយសម្រួលការងារដល់ប្រជាពលរដ្ឋ ឬអតិថិជន ប្រយោជន៍ដើម្បីភាពរីកចម្រើន នៃសេដ្ឋកិច្ច របស់ខេត្តព្រះសីហនុ ក៏ដូចជាភាពរីកចម្រើន របស់ក្រុមអាជីវករ។ ហើយក្នុងនោះ ធនាគារទាំងអស់ ក៏បានផ្តល់ប្រាក់ពន្ធយ៉ាងច្រើន សម្រាប់ប្រាក់ខែមន្ត្រីរាជការ ជាដើម ហេតុនេះគួរតែមន្ត្រីជំនាញច្រកចេញចូល នៅតាមស្ថាប័ននីមួយៗ ចូលរួមសហការណ៍គ្នាធ្វើការងារ ឲ្យបានរលូនទៅមុខដោយអនុគ្រោះផងចុះ។
ទោះជាបែបនេះក្តី មិនទាន់អាចទាក់ទង មន្ត្រីជំនាញច្រកចេញចូល នៃរដ្ឋបាលខេត្តព្រះសីហនុ ដើម្បីបំភ្លឺទៅលើកង្វល់ របស់ប្រជាពលរដ្ឋ ក៏ដូចជាវិស័យធនាគារ នៅក្រុងព្រះសីហនុបានទេ នៅរសៀលថ្ងៃអង្គារ ទី៧ ខែសីហា ឆ្នាំ២០១៨នេះ៕ ដែន សីមា