ខេត្តស្វាយរៀង ៖ ដោយមើលឃើញពីតម្រូវការចាំបាច់ និងឆ្លើយតបចំពោះសំណូមពររបស់បងប្អូនប្រជាពលរដ្ឋដែលបានស្នើសុំនៅក្នុងវេទិកាសាធារណៈរបស់ក្រុមការងារថ្នាក់ជាតិចុះមូលដ្ឋាននៅក្រុងស្វាយរៀងនាពេលកន្លងមក លោក ម៉ែន វិបុល អភិបាល នៃគណៈអភិបាលខេត្តស្វាយរៀង បានសម្រេចផ្តល់ជូននូវស្ពានបាឡេមួយខ្សែមានប្រវែង៣០ម៉ែត្រ និងទទឹង ៤ម៉ែត្រ នៅភូមិអកនាគ សង្កាត់សង្ឃ័រ ក្រុងស្វាយរៀង និងបានចុះត្រួតពិនិត្យដំណើរការសាងសង់ នាព្រឹកថ្ងៃអង្គារ ១១រោច ខែទុតិយាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៧ ខែសីហា ឆ្នាំ២០១៨នេះ ។
មានប្រសាសន៍នៅក្នុងឱកាសចុះត្រួតពិនិត្យការស្ថាបនាស្ពាននេះ លោក ម៉ែន វិបុល អភិបាល នៃគណៈអភិបាលខេត្តស្វាយរៀង បានថ្លែងនូវការអរគុណដល់មន្ទីរអង្គភាពពាក់ព័ន្ធ អាជ្ញាធរក្រុង សង្កាត់ ព្រះគ្រូចៅអធិការវត្តក្ដីរំដួល និងបងប្អូនប្រជាពលរដ្ឋទាំងអស់ដែលបានចូលរួមសហការយ៉ាងសស្រាក់សស្រាំក្នុងការសាងសង់ស្ពាននេះឡើង ដែលរហូតមកដល់ពេលនេះសម្រេចបានប្រមាណជា ៣០ភាគរយ ។ នេះគឺជាការសរបញ្ជាក់ឲ្យឃើញពីការរួមសហការគ្នារវាងវិស័យពុទ្ធចក្រ និងអាណាចក្រ រវាងរដ្ឋ និងប្រជាពលរដ្ឋ ក្នុងការកសាងសមិទ្ធផលដែលជាប្រយោជន៍សាធារណៈនេះ ហើយឯកឧត្ដមសង្ឃឹមថាក្រោយសាងសង់រួចស្ពាននេះនឹងផ្ដល់ផលច្រើនជាងមុនសម្រាប់បងប្អូនប្រជាពលរដ្ឋ ក៏ដូចជាសិស្សានុសិស្ស និងពុទ្ធបរិស័ទ ធ្វើដំណើរដឹកជញ្ជូនកសិផលទៅកាន់ទីផ្សារ ធ្វើដំណើរទៅសាលារៀន មន្ទីរពេទ្យ ធ្វើបុណ្យទាននៅវត្តអារាម និងទៅប្រកបមុខរបររកស៊ីទទួលទានប្រចាំថ្ងៃ ។
ឆ្លៀតក្នុងឱកាសនោះផងដែរ លោកអភិបាលខេត្ត ក៏បានថ្លែងនូវការអរគុណដល់បងប្អូនប្រជាពលរដ្ឋរស់នៅសង្កាត់សង្ឃ័រ ដែលបានបំពេញកាតព្វកិច្ចជាពលរដ្ឋល្អ និងគំរូនៅក្នុងសង្គមប្រជាធិបតេយ្យ ដោយបានអញ្ជើញទៅចូលរួមការបោះឆ្នោតជ្រើសតាំងតំណាងរាស្ត្រនាពេលកន្លងមកនេះ យ៉ាងច្រើនលើសលប់ ដើម្បីជ្រើសរើសថ្នាក់ដឹកនាំដែលខ្លួនស្រឡាញ់ពេញចិត្ត ។ ជាមួយនេះ លោកអភិបាលខេត្ត បានផ្ដាំផ្ញើដល់អាជ្ញាធរក្រុង សង្កាត់ ភូមិ និងគ្រប់អង្គភាពទាំងអស់ត្រូវបន្តចុះមូលដ្ឋានដើម្បីដោះស្រាយកង្វល់ សំណើ សំណូមពររបស់បងប្អូនប្រជាពលរដ្ឋឲ្យបានកាន់តែល្អជាងមុន ទូលាយជាងមុន ប្រសិទ្ធភាពជាងមុន និងសម្រចបាននូវផលប្រយោជន៍ច្រើនជាងមុនឆ្លើយតបនឹងតម្រូវការពិតប្រាកដរបស់ប្រជាពលរដ្ឋ ។
ចុងបញ្ចប់នៃពិធីនេះ លោកអភិបាលខេត្តក៏បានឧបត្ថម្ភដល់បងប្អូនប្រជាពលរដ្ឋដែលចូលរួមក្នុងម្នាក់ៗ ទទួលបានថវិកា ចំនួន២០.០០០រៀល ផងដែរ ។ បងប្អូនប្រជាពលរដ្ឋដែលទទួលបានសមិទ្ធផលស្ពាននេះបានសម្ដែងនូវការត្រេកអរ និងសប្បាយរីករាយព្រមទាំងបានថ្លែងអំណរគុណដល់ឯកឧត្តមអភិបាលខេត្ត ដែលជានិច្ចកាលតែងតែបានចុះជួយ និងយកចិត្តទុកដាក់ពីសុខទុក្ខ និងដោះស្រាយសំណូមពរនានាជូនប្រជាពលរដ្ឋគ្រប់ពេលវេលា ។
បន្ទាប់ពីអញ្ជើញចុះពិនិត្យស្ពានអកនាគ លោកអភិបាលខេត្តក៏បានបន្តដំណើរចុះពិនិត្យមើលការស្ថាបនាច្រាំងទន្លេវ៉ៃគោ ក្រុងស្វាយរៀង ដែលបច្ចុប្បន្នកំពុងពន្លឿនការសាងសង់ ពិសេសវេទិកាអ៊ុំទូកដែលត្រៀមសម្រាប់ពិធីប្រណាំងទូកនៅខេត្តស្វាយរៀង នឹងចូលមកដល់នៅខែវិច្ឆិកា ឆ្នាំ២០១៨ខាងមុខនេះ៕ វ៉ៃកូ
