បុគ្គលិកនៅហាងធ្វើក្រចកវៀតណាម នៅក្នុងប្រទេសកាណដា បានបង្ខំចិត្តចាក់សោរទ្វារមុខរបស់ពួកគេ ដើម្បីរារាំងអតិថិជនមិនពេញចិត្តមួយក្រុម គេចខ្លួនចេញបន្ទាប់ពីពួកគេបដិសេធបង់ថ្លៃសេវាកម្ម ។
វីដេអូបង្ហោះដោយអ្នកលេងហ្វេសប៊ុកម្នាក់ឈ្មោះថា Sunny Gandhi បានបង្ហាញឲ្យឃើញស្ត្រីម្នាក់ និងដៃគូរបស់នាង បានព្យាយាមចាកចេញពីហាងធ្វើក្រចកមួយ នៅក្នុង Brampton, Ontario ដោយពុំបានបង់ប្រាក់ ។
នៅចំណុចមួយ ម្នាក់ក្នុងចំណោមអតិថិជនទាំងពីរ បានស្រែកថា៖ «អ្នកឯងរកស៊ីបើកហាងផ្តល់សេវាកម្មភ្លីភ្លើចឹងមែន! គួរតែរៀនរបៀបរកស៊ីជាថ្មីទៅ គ្មាននរណាគេបង់ឲ្យអ្នកឯងទេ ធ្វើការងារឡប់ៗបែបនេះ ។ ឲ្យខ្ញុំចាកចេញពីហាងឡប់ៗរបស់អ្នកឯងទៅ ។ សូមកុំមកប៉ះខ្ញុំឲ្យសោះ!!» ។
អតិថិជនម្នាក់ទៀត បានព្យាយាមទាញទ្វារបើក ប៉ុន្តែ ម្នាក់ក្នុងចំណោមបុគ្គលិកហាង ព្យាយាមខ្ទប់ទ្វារពីខាងក្រៅមិនឲ្យចេញ ។ ចំណែកបុគ្គលិកម្នាក់ទៀត បានគ្រប់គ្រងទាក់ទងទៅប៉ូលីសដែលមកដល់ និងចាប់ស្ត្រីទាំងពីរដាក់ខ្នោះ ។
បើតាមប្រភពព័ត៌មានបានឲ្យដឹងថា អតិថិជននោះបានទទួលការដុសខាតក្រចកតម្លៃ ៧៦ ដុល្លារ ប៉ុន្តែ ពេលធ្វើរួចរាល់ នាងពុំពេញចិត្តនឹងវាទេ ហើយបានបង់ប្រាក់ត្រឹមតែពាក់កណ្តាលប៉ុណ្ណោះ ។ ហេតុនេះ អំពើហិង្សារវាងភាគីទាំងពីរក៏បានផ្ទុះឡើងតែម្តង ។
ហេតុការណ៍ស្រដៀងគ្នានេះ បានកើតឡើងនៅក្នុងហាងធ្វើក្រចកមួួយកន្លែង នៅក្នុង Chiliwack, British Columbia ប្រទេសកាណដា -ទីកន្លែងដែលស្ត្រីម្នាក់ត្រូវបានគេរាយការណ៍ថា ត្រូវបានចាក់សោរបង្ខាំងទុក រហូតដល់ប៉ូលីសមកដល់ ។
គួររម្លឹកផងដែរថា ថ្មីៗនេះ ហាងធ្វើក្រចកមួយនៅក្នុងទីក្រុងញូវយ៉ក ក៏បង្កឲ្យមានការរិះគន់ផងដែរ បន្ទាប់ពីវីដេអូមួយបង្ហាញឲ្យឃើញបណ្តាបុគ្គលិកជាជនជាតិអាស៊ី ព្រួតគ្នាយកដងអំបោក និងប្រដាប់ចូកសំរាម វាយមកលើអតិថិជនមិនពេញសេវាកម្មរបស់ពួកគេ ហើយពុំបង់ប្រាក់ ៕ ចន្ទី (nextshark)