វីដេអូចាក់ដោតបេះដូងមួយ បានកំពុងត្រូវបានចែករំលែក និងទទួលការចាប់អារម្មណ៍ជាខ្លាំង ពីសំណាក់មនុស្សយ៉ាងច្រើននៅលើបណ្តាញសង្គម ដែលវីដេអូនេះបានបង្ហាញឲ្យឃើញស្ត្រីអ្នកស្រែវ័យចំណាស់ម្នាក់ អង្គុយទ្រហ៊ោយំដ៏កំសត់នៅជាប់ចិញ្ចើមផ្លូវកន្លែង នៅក្នុងទីក្រុង Bali ប្រទេសឥណ្ឌូនេស៊ី ។
យោងតាមប្រភពព័ត៌មាន ស្ត្រីកំសត់ម្នាក់នេះបាននិយាយថា គ្រួសាររបស់គាត់បានបោះបង់គាត់ចោល ។ គាត់មកពីស្រុកឆ្ងាយ Medan កោះស៊ូម៉ាត្រា ដើម្បីមកជួបកូនស្រីរបស់គាត់ដែលបានរៀបការជាមួយជនជាតិបរទេសនៅទីនេះ ក្នុងទីក្រុង Bali ប៉ុន្តែ កូនស្រីរបស់គាត់បដិសេធជួបគាត់ទេ ។
ខណៈគាត់នៅតែបន្តយំ មនុស្សម្នាក៏បានប្រមូលផ្តុំមកមើលគាត់ និងព្យាយាមឲ្យគាត់រំងាប់អារម្មណ៍ផងដែរ ប៉ុន្តែ ពុំអាចទេ ។ មនុស្សម្នាក់អាចត្រូវបានលឺនិយាយនៅក្នុងវីដេអូ សុខចិត្តជូនគាត់ទៅកាន់ផ្ទះកូនស្រីរបស់គាត់ទៀតផង ប៉ុន្តែ ស្ត្រីរូបនេះឆ្លើយតបថា គាត់ពុំមានអស័យដ្ឋានអំពីទីកន្លែងស្នាក់នៅរបស់កូនស្រីទេ និងគ្រាន់តែដឹងថា កូនស្រីរបស់គាត់ធ្វើការនៅកន្លែងស្ប៉ា នៅក្នុងតំបន់ Canggu ។
នៅពេលគេអនុញ្ញាតឲ្យគាត់ស្នាក់នៅផ្ទះរបស់ពួកគេ១យប់ ដើម្បីរង់ចាំព្យាយាមស្វែងរកទីតាំងស្នាក់នៅរបស់កូនស្រីគាត់នៅព្រឹកស្អែកបន្ត ស្ត្រីរូបនេះបានបដិសេធ ។
ស្ត្រីរូបនេះត្រូវបានលឺនិយាយថា៖ «អត់ទេ ទុកឲ្យខ្ញុំនៅទីនេះបានហើយ ខ្ញុំមិនស្វែងរកនាងទៀតទេ ។ ទុកឲ្យនាងដឹងថា កុំមានការសោកស្តាយតទៅទៀតឲ្យសោះ ព្រោះនាងពេញចិត្តជនបរទេស ជាជាងម្តាយរបស់ខ្លួន» ។
អ្នកប្រើប្រាស់ហ្វេសប៊ុកឈ្មោះថា “Hendry” បានសរសេរចំណងជើងវីដេអូថា៖ «ម្តាយម្នាក់នេះមកពីស្រុកឆ្ងាយ Medan ទៅកាន់ Bali ដើម្បីមកជួបកូនស្រីរបស់គាត់ ដែលបានរៀបការជាមួយជនបរទេសម្នាក់ ។ ប៉ុន្តែ នៅពេលគាត់បានមកដល់ក្នុង Bali កូនស្រីរបស់គាត់បែរជាមិនចង់ជួបមុខគាត់ ព្រោះតែនាងខ្លាចអាម៉ាស ពេលសារភាពថា គាត់ជាម្តាយរបស់នាង» ។
«កូនគាត់ខំចិញ្ចឹមបីបាច់យ៉ាងលំបាកវេទនា ដើម្បីបានរៀនសូតចេះដឹងនឹងគេ តាមរយៈការដើរលក់ថ្មាំឱសថបុរាណ ប៉ុន្តែ ចុងក្រោយ កូនស្រីរបស់គាត់ បានត្រឹមទំនាក់ទំនងទៅគាត់តាមរយៈទូរស័ព្ទប៉ុណ្ណោះ» ។
«សង្ឃឹមថា នេះជាមេរៀនមួយសម្រាប់កូនៗដទៃ ដែលចាកចោលផ្ទះ ធ្វើការនៅស្រុកឆ្ងាយបានយល់ដឹងផង ។ មិនមានភាពជោគជ័យទេ បើគ្មានការលះបង់ពីឪពុកម្តាយរបស់អ្នក» ៕ ចន្ទី (Coconuts)
