ឧត្តរមានជ័យ ៖ លោកស្នងការនគរបាលឧត្តរមានជ័យ បានមានប្រសាសន៍ណែនាំ ដល់មន្ត្រីចំណុះស្នងការដ្ឋាននគរបាលទាំងអស់ ត្រូវបម្រើប្រជាពលរដ្ឋ ឲ្យមានប្រសិទ្ធភាព កុំឲ្យមានការថ្នាំងថ្នាក់ និងឲ្យបានទាន់ពេលវេលា ជាពិសេសលើការងារព្រហ្មទណ្ឌ ត្រូវពង្រឹងសមត្ថភាពបង្ការ បង្ក្រាប ពិនិត្យគ្រប់គោលដៅដែលស្មុគស្មាញ ល្បាតតាមគោលដៅសំខាន់ៗ និងបង្ក្រាបឲ្យបានរាល់បទល្មើសដែលកើតឡើង។
ព្រឹកថ្ងៃពុធ ទី៨ ខែសីហា ឆ្នាំ២០១៨ នៅសាលប្រជុំស្នងការដ្ឋាននគរបាលខេត្តឧត្តរមានជ័យ បានប្រជុំបូកសរុបសភាពការណ៍ លទ្ធផលកិច្ចប្រតិបត្តិការរក្សាសន្តិសុខ សណ្តាប់ធ្នាប់សុវត្ថិភាព លើការងារជំនាញ និងលើកទិសដៅការងារបន្ត ក្រោមអធិបតីភាពលោកឧត្តមសេនីយ៍ទោ ម៉ែន លី ស្នងការនគរបាលខេត្ត ដោយមានការអញ្ជើញចូលរួមពីលោកស្នងការរងទទួលផែន លោកនាយការិយាល័យ លោកអធិការក្រុង-ស្រុក លោកមេបញ្ជាការវរសេនាតូចទាំង២ លោកនាយ-នាយរងប៉ុស្តិ៍ និងមន្ត្រីប៉ុស្តិ៍ទាំង២៤ សរុបចំនួន ២៦៣ នាក់ ស្រី៥ នាក់ ។
មានប្រសាសន៍ក្នុងកិច្ចប្រជុំលោកឧត្តមសេនីយ៍ស្នងការ បានលើកឡើងក្នុងនាមជាមន្ត្រីនគរបាល ត្រូវតែបង្កើនការងារ ការពារសន្តិសុខ សុវត្ថិភាពសណ្តាប់ធ្នាប់ឲ្យបានល្អ។ ក្នុងឱកាសនោះ លោកឧត្តមសេនីយ៍ ស្នងការ ក៏បានដាក់ផែនការដល់កងកម្លាំងនគរបាលលើការងារព្រហ្មទណ្ឌ ត្រូវពង្រឹងសមត្ថភាពបង្ការ បង្ក្រាប ពិនិត្យគ្រប់គោលដៅដែលស្មុគស្មាញ ល្បាតតាមគោលដៅសំខាន់ៗ និងបង្ក្រាបឲ្យបានរាល់បទល្មើសដែលកើតឡើង ។ ការងារប៉ុស្តិ៍នគរបាលរដ្ឋបាល ពាក់ព័ន្ធឥរិយាបថ គឺធ្វើឲ្យបានល្អជាមួយប្រជាពលរដ្ឋ សូមបន្តយកចិត្តទុកដាក់លើការងារផ្តល់អត្តសញ្ញាណប័ណ្ណ និងផ្តល់សេវាជូនប្រជាពលរដ្ឋ ។
ការងារភូមិឃុំមានសុវត្ថិភាព សូមកោតសរសើរដល់ប៉ុស្តិ៍ដែលបានខិតខំអនុវត្តកន្លងមក និងសូមបន្តយកចិត្តទុកដាក់ផ្សព្វផ្សាយបន្ថែមទៀត ។ ការងារសន្តិសុខ ត្រូវបន្តយកចិត្តលើការងារសន្តិសុខ ក្នុងមូលដ្ឋានដែលខ្លួនគ្រប់គ្រង ៕ ដោយ ៖ បញ្ញាស័ក្តិ
