កាសែត Shiyan Evening News បានរាយការណ៍ឲ្យដឹងថា ស្ត្រីជាម្តាយវ័យក្មេងម្នាក់ ដែលរុញរទេះដាក់កូនប្រុសអាយុ ៧ ខែ របស់នាង ដើរលេងសសៀនឹងចិញ្ចើមផ្លូវ ត្រូវបានវាយប្រហារដោយកង់រថយន្តកុងតឺន័រ១គូយ៉ាងសាហាវ ដែលបានដាច់ពុំដឹងតាំងពីកន្លែងណាមកទេ ។
ស្ត្រីម្នាក់ត្រូវបានស្គាល់ថាមានឈ្មោះ Yuan តែងមានទម្លាប់ដាក់កូនប្រុសរបស់នាងនៅក្នុងរទេះកូនង៉ែត រុញដើរលេងតាមចិញ្ចើមថ្នល់ នៅរៀងរាល់ពេលព្រឹក នៅក្នុងទីប្រជុំជន Loutai ស្រុក Zhushan ទីក្រុង Shiyan ខេត្ត Hubei ប្រទេសចិន ។ ប៉ុន្តែ ជាអកុសល នៅវេលាម៉ោង ៨ និង ១០ នាទី ព្រឹកថ្ងៃទី០៣ ខែសីហា ស្រាប់តែរថយន្តកុងតឺន័រដឹកថ្ម១គ្រឿងបើកបញ្ច្រាសទិស បានដាច់កង់១គូ បណ្តាលឲ្យរមៀលយ៉ាងលឿន សំដៅម្តាយ និងកូនទាំងពីរតែម្តង ។
តាមរយៈវីដេអូ កង់ធំៗ១គូដែលបានដាច់នោះ ត្រូវបានឃើញរត់ទៅមុនរថយន្តកុងតឺន័រ និងបានវាយប្រហារម្តាយ និងកូនទាំងពីរដែលគ្មានឱកាសគេចទាន់ពេលវេលាយ៉ាងពេញទំហឹង ។ ក្នុងនោះផងដែរ បុរសម្នាក់ដែលគេជឿថា ជាគ្រួសាររបស់ស្ត្រីរងគ្រោះ ក៏ទទួលរងនូវការវាយប្រហារដ៏សែនរន្ធត់នេះផងដែរ ។ បុរសម្នាក់ និងរទេះទារក ត្រូវបានឃើញខ្ទាចចូលកណ្តាលថ្នល់ ខណៈស្ត្រីជាម្តាយផ្លោងទៅផ្ទប់នឹងកង់រថយន្តតូចពណ៌ខ្មៅ១គ្រឿង កំពុងចតស្ងៀមគួរឲ្យអាសូរបំផុត ។
កម្លាំងដ៏រមៀលខ្លាំងក្លារបស់កង់នេះ ពុំបានឈប់នោះទេ ដោយវាបានបន្តរមៀលកាត់ផ្លូវ ចូលទៅផ្ទប់នឹងដើមឈើ មុខផ្ទះអ្នកជិតខាងមួយ ។ ហើយលទ្ធផលនៃហេតុការណ៍ដ៏ពុំនឹកស្មាននេះ ត្រូវបានគេរាយការណ៍ឲ្យដឹងថា កូនង៉ែតនោះបានស្លាប់ ដោយសាររងរបួសប៉ះទង្គិចដ៏ធ្ងន់ធ្ងរ ៕ ឧត្តម (kuaibao)