រឿងរ៉ាវសង្ឃ Wiraphon Sukphon ធ្លាប់បានធ្វើឱ្យរញ្ជួយសាធារណមតិថៃតាំងពីឆ្នាំ២០១៣ បន្ទាប់ពីខ្សែវីដេអូមួយបានបង្ហាញឱ្យឃើញសង្ឃរូបនេះពាក់វ៉ែនតាខ្មៅ ប្រើប្រាស់កាបូបលុយ Louis Vuitton អង្គុយលើយន្ដហោះឯកជន បានសាយភាយពេញបណ្ដាញសង្គម។
សង្ឃវ័យ៣៩ឆ្នាំរូបនេះធ្លាប់រត់គេចខ្លូនទៅកាន់អាមេរិក ប៉ុន្ដែត្រូវបានធ្វើបត្យាប័នវិលត្រឡប់មកថៃវិញដើម្បីប្រឈមនឹងការចោទប្រកាន់ពីបទរំលោភអនីតិជនម្នាក់ ព្រមទាំងឆបោកបច្ច័យរបស់ពុទ្ធបរិស័ទថាយកមកសាងសង់បដិមាព្រះពុទ្ធធ្វើអំពីមរកតធំបំផុតលើពិភពលោក។ការស៊ើបអង្កេតបើកទូលាយបង្ហាញថា Wiraphon ជាម្ចាស់កម្មសិទ្ធិនៃរថយន្ដទំនើបច្រើនគ្រឿង ជាម្ចាស់គណនីជាច្រើនដែលមានតម្លៃប្រមាណ 700.000 USD។
Wiraphon បានត្រូវចោទប្រកាន់ពីបទលាងលុយកខ្វក់ ឆបោក និងបំពានច្បាប់ Internet ព្រោះបានប្រមូលមូលនិធិដោយអនឡាញ។
បណ្ដាចៅក្រមបានកាត់ទោសនិងប្រកាសសាលក្រមឱ្យជាប់ពន្ធនាគារ១១៤ឆ្នាំ ប៉ុន្ដែតាមច្បាប់ប្រទេសថៃនឹងនៅក្នុងពន្ធនាគារមិនលើសពី២០ឆ្នាំឡើយ។
សង្ឃអង្គនេះក៏ត្រូវបានតម្រូវឱ្យសងប្រាក់២៨,៦លានបាត(ជាង860.000 USD)ចំពោះពុទ្ធបរិស័ទដែលបានជួយឧបត្ថម្ភ ហើយបានដាក់ពាក្យប្ដឹង។
នៅមានសវនាការកាត់ទោសពីបទចាប់រំលោភ ដែលនឹងប្រព្រឹត្ដទៅនៅខែតុលាខាងមុខ។តាមអយ្យការ Wiraphon ត្រូវបានចោទប្រកាន់ពីបទទំនាក់ទំនងជាមួយនារីអនីតិជនម្នាក់មុននេះប្រមាណ១០ឆ្នាំ ហើយបានមានកូនទៀតផង ចំពោះទោសមួយនេះ Wiraphon អាចត្រូវបានកាត់ទោសឱ្យជាប់គុក២០ឆ្នាំ៕
សូយន