កំពត ៖ នៅថ្ងៃទី៩ ខែសីហា ឆ្នាំ២០១៨ នៅខេត្តកំពត អង្គការ Swisscontact សហការជាមួយក្រសួងទេសចរណ៍ នៃព្រះរាជាណាចក្រកម្ពុជា បានរៀបចំពិធីបើកវគ្គបណ្តុះបណ្តាល បដិសណ្ឋារកិច្ចសម្រាប់ខេត្តកំពត (HoKa)។ ពិធីនេះមានការអញ្ជើញចូលរួមដោយលោក ប៉ាក់ សុខុម រដ្ឋាលេខាធិការក្រសួងទេសចរណ៍ ជាតំណាងដ៏ខ្ពង់ខ្ពស់របស់រដ្ឋមន្ត្រីក្រសួងទេសចរណ៍។
លោក Rajiv Pradhan នាយកប្រចាំប្រទេសអង្គការ Swisscontact បានថ្លែងថា អង្គការ Swisscontact តាមរយៈកម្មវិធី MIGIP កំពុងអនុវត្តគម្រោងបណ្តុះបណ្តាល បដិសណ្ឋារកិច្ចសម្រាប់ខេត្តកំពត ដើម្បីគាំទ្រការអភិវឌ្ឍជំនាញទេសចរណ៍ នៅគោលដៅទេសចរណ៍នៅតំបន់ឆ្នេរ។ ផលិតផលបណ្តុះបណ្តាលគម្រោង HoKa ត្រូវបានចងក្រងឡើងដោយអង្គការ Swisscontact សហការជាមួយគណៈកម្មាធិការអ្នកជំនាញទេសចរណ៍ (NCTP) នៃក្រសួងទេសចរណ៍។
ក្រោមការគាំទ្ររបស់គម្រោង HoKa យើងរំពឹងថាអ្នកបម្រើសេវាកម្មអាហារនិងភេសជ្ជៈចំនួន ៤០នាក់មកពីអាជីវកម្មទេសចរណ៍ចំនួន២០កន្លែង នឹងត្រូវបានបណ្តុះបណ្តាលដោយគ្រូបង្គោលថ្នាក់ជាតិចំនួន៨នាក់ ធ្វើការក្នុងវិស័យឯកជន ហើយដែលមានការទទួលស្គាល់ពីក្រសួងទេសចរណ៍។ ក្រោយវគ្គបណ្តុះបណ្តាល សិក្ខាកាមដែលធ្វើការវាយតម្លៃជាប់នឹងទទួលបានវិញ្ញាបនបត្រ បញ្ជាក់ពីសមត្ថភាពដែលផ្តល់ជូន ដោយគណៈកម្មាធិការជាតិអ្នកជំនាញទេសចរណ៍។
នៅឆ្នាំ២០១៨ គម្រោង HoKa ធ្វើការបណ្តុះបណ្តាលចំនួន២វគ្គ ហើយវគ្គនិមួយៗមានរយៈពេល៦សប្តាហ៍។ វគ្គទី១នឹងចាប់ផ្តើមពីថ្ងៃទី១៥ ខែសីហា រហូតដល់ ថ្ងៃទី១៩ ខែកញ្ញា ហើយវគ្គទី២នឹងចាប់ផ្តើមពីថ្ងៃទី២៦ ខែកញ្ញា រហូតដល់ថ្ងៃទី៧ ខែវិច្ឆិកា ឆ្នាំ២០១៨។
HoKa គឺជាកម្មវិធីបណ្តុះបណ្តាលខាងក្នុង (In-House Training)ដំបូងគេ ដែលផ្តោតលើអ្នកធ្វើការងារដែលមិនសូវមានជំនាញនៅតាមសណ្ឋាគារ និងភោជនីយដ្ឋាន ដើម្បីអោយពួកគេអាចប្រើប្រាស់ជំនាញបច្ចេកទេសដែលបានសិក្សានៅកន្លែងការងាររបស់ពួកគេ។ ការបណ្តុះបណ្តាលគម្រោងHoKa ត្រូវបានធ្វើឡើងអោយស្របទៅតាមក្របខ័ណ្ឌគុវឌ្ឍិជាតិ និងអាស៊ានស្របតាមស្មារតីនៃកិច្ចព្រមព្រៀងទទួលស្គាល់គ្នាទៅវិញទៅមកលើអ្នកជំនាញទេសចរណ៍អាស៊ាន (MRA-TP) ការបណ្តុះបណ្តាលHoKa មាន១២មេរៀនដែលរៀបចំឡើងដោយផ្តោតលើអ្នកបម្រើសេវាកម្មអាហារនិងភេសជ្ជៈនៅខេត្តកំពត។ មេរៀនដែលត្រូវរៀនរួមមាន១) ការងារខ្ញុំជាអ្នកបម្រើសេវាកម្ម ២) ការទំនាក់ទំនងក្នុងបដិសណ្ឋារកិច្ច ៣)សេវាកម្មប្រណីត ៤)សម្ភារបិរក្ខាភោជនីយដ្ឋាន ៥)ចំណេះដឹងអំពីបញ្ជីមុខម្ហូប ៦)ចំណេះដឹងអំពីភេសជ្ជៈ ៧)ជំនាញលក់ ៨)ជំនាញសេវាកម្ម ៩)សេវាកម្មភេសជ្ជៈ ១០)លំដាប់លំដោយក្នុងការផ្តល់សេវាកម្មនៅក្នុងភោជនីយដ្ឋាន ១១) នីតិវិធីក្នុងភោជនីយដ្ឋាន ១២)អនាម័យ សន្តិសុខ និងសុវត្ថិភាពក្នុងភោជនីយដ្ឋាន។
លោក ប៉ាក់ សុខុម រដ្ឋាលេខាធិការក្រសួងទេសចរណ៍ បានថ្លែងថា បច្ចុប្បន្នវិស័យទេសចរណ៍ត្រូវបានរាជរដ្ឋាភិបាលកម្ពុជា ចាត់ទុកថា ជាមានបៃតង និងជាការនាំចេញនៅនឹងកន្លែង ដោយបានរួមចំណែកចូលរួមអភិវឌ្ឍ សេដ្ឋកិច្ច និងសង្គម តាមរយៈការបង្កើត ប្រាក់ចំណូលជូនជាតិ បង្កើតការងារ ជំរុញការវិនិយោគ និងចូលរួមកាត់បន្ថយភាពក្រីក្រ របស់ប្រជាពលរដ្ឋ ។ លើសពីនេះទៀត ទេសចរណ៍ក៏បានចូលរួមចំណែកលើកកម្បស់ថែរក្សា និងអភិរក្សសម្បត្តិវប្បធម៌ និងធម្មជាតិរបស់ប្រទេសចូលរួមកាត់បន្ថយ ការកើនឡើងនៃកំដៅភពផែនដី ព្រមទាំងទ្រទ្រង់ការអភិវឌ្ឍប្រកបដោយចីរភាព។
លោកបានបន្ថែមថា វគ្គបណ្តុះបណ្តាលបដិសណ្ឋារកិច្ចសម្រាប់ខេត្តកំពត នឹងផ្តល់នូវចំណេះដឹង ជំនាញ និងឥរិយាបថខ្ពស់ ដល់យុវជន យុវនារីកម្ពុជា ដើម្បីអាចចូលរួមអភិវឌ្ឍសមត្ថភាព ឲ្យកាន់តែប្រសើរឡើង ជាពិសេសជំរុញការផ្តល់សេវាកម្មប្រកបដោយ ភាពកក់ក្តៅជូនភ្ញៀវទេសចរជាតិ និងអន្តរជាតិ និងចូលរួមលើកកម្ពស់ខេត្តកំពត ជាខេត្តគោលដៅទេសចរណ៍សម្រាប់បច្ចុប្បន្ន និងអនាគត។ ពាក់ព័ន្ធទៅនឹងកិច្ចសហការក្នុងភាពជាដៃគូររដ្ឋនិងឯកជន គណៈកម្មាធិការអ្នកជំនាញទេសចរណ៍ នៃក្រសួងទេសចរណ៍ បានខិតខំប្រឹងប្រែងពង្រឹងកិច្ចសហប្រតិបត្តិការជាមួយអង្គការ និងដៃគូរអភិវឌ្ឍ ដើម្បីចូលរួមពង្រឹងអភិវឌ្ឍវិស័យទេសចរណ៍នៅកម្ពុជា៕ ដោយ ៖ កូឡាប