សៀមរាប៖ មន្ទីរព័ត៌មានខេត្តសៀមរាប បានផ្សព្វផ្សាយថា មានករណីគ្រោះថ្នាក់ចរាចរមួយបានកើតឡើង នៅចំណុចលើផ្លូវជាតិលេខ៦ ស្ថិតក្នុងភូមិគោកអំពិល ឃុំល្វែងឫស្សី ស្រុកជីក្រែង រវាងរថយន្តដឹកសាំង បុកជាមួយនឹងរថយន្តកែច្នៃដាក់ម៉ាស៊ីនកិនស្រូវចល័ត បណ្ដាលឲ្យមនុស្សម្នាក់ស្លាប់ និង ម្នាក់ទៀតបានរងរបួសធ្ងន់ នៅម៉ោងជាង៣រសៀល ថ្ងៃទី៩ ខែសីហា ឆ្នាំ២០១៨នេះ។
នគរបាលស្រុកជីក្រែងបានបញ្ជាក់ទៀតថា មុនពេលកើតហេតុ គឺមានរថយន្តដឹកសាំង ជារបស់ក្រុមហ៊ុន ហុងអ៊ីនខេមបូឌា ពាក់ស្លាកលេខភ្នំពេញ 3E-0279 បើកបរពីទិសដៅពីទិសខាងលិចទៅទិសខាងកើត គឺធ្វើដំណើរចេញពីខេត្តសៀមរាប ឆ្ពោះទៅរាជធានីភ្នំពេញ បើកបរក្នុងល្បឿនលឿន លុះដល់ចំណុចកើតហេតុ បានបុករថយន្តកែច្នៃដាក់ម៉ាស៊ីនកិនស្រូវចល័ត ដែលបានបើកបរមកពីទិសខាងត្បូង ឡើងមកលើផ្លូវជាតិ រួចបត់ស្ដាំទៅទិសខាងកើត បណ្ដាលឲ្យម្ចាស់រថយន្តកែច្នៃ ២នាក់ប្រពន្ធ ក្នុងនោះ ឈ្មោះ គាត គា អាយុ៤៤ភេទប្រុស ត្រូវជាប្ដី មានទីលំនៅភូមិតាអុង ឃុំល្វែងឫស្សី ស្រុកជីក្រែង បានស្លាប់នៅនឹងកន្លែងកើតហេតុ និង ឈ្មោះ ឈន ឃន់ អាយុ៤៥ឆ្នាំ ភេទស្រី ត្រូវជាប្រពន្ធ បានទទួលរងរបួសធ្ងន់ ហើយត្រូវបានដឹកសង្គ្រោះទៅពេទ្យបង្អែកសូទ្រនិគម រីឯអ្នកបើកបររថយន្តដឹកសាំង បានរត់គេចខ្លួនបាត់ ។
សមត្ថកិច្ចបាននាំយករថយន្តទាំងពីរ ទៅរក្សាទុកនៅអធិការដ្ឋាននគរបាលស្រុកជីក្រែង ដើម្បីដោះស្រាយទៅតាមផ្លូវច្បាប់ ៕ ដោយ ៖ បញ្ញាស័ក្តិ