ឳពុកម្ដាយក្មេកប្រធានាធិបតី Donald Trump បានក្លាយជាពលរដ្ឋអាមេរិកបន្ទាប់ពីទទួលបានសញ្ជាតិតាមរយៈកូនស្រីរបស់ពួកគេធានា។ នោះគឺជារូបភាពទទួលបានសញ្ជាតិក្រោមរូបភាពធានា ហើយដែលនេះគឺជារឿងមួយដែលរដ្ឋការដឹកនាំដោយកូនប្រសារបស់ពួកគេចង់បញ្ចប់នោះ។
មេធាវីអន្ដោប្រវេសន៍របស់លោកViktor និងអ្នកស្រីAmalija Knavs, ត្រូវជាឳពុកម្ដាយបង្កើតរបស់ជំទាវទី១អាមេរិក Melania Trump បញ្ជាក់ថា អ្នកទាំងពីរត្រូវបានផ្ដល់សញ្ជាតិអាមេរិកកាលពីថ្ងៃទី៩ខែសីហា។មេធាវីរូបនេះប្រាប់ CNN ថា រឿងរ៉ាវប្រព្រឹត្ដទៅងាយស្រួល ហើយពួកគេរីករាយនិងរំភើបចំពោះពេលក្លាយជាពលរដ្ឋអាមេរិកនេះ។
លោកViktor និងអ្នកស្រីAmalija Knavs បានចាកចេញពីSlovenia ហើយក្រោយមកត្រូវបានផ្ដល់ប័ណ្ណស្នាក់នៅបណ្ដោះអាសន្ន ប្រទេសអាមេរិក។ចាប់តាំងពីកូនប្រសាពួកគេក្លាយជាប្រធានាធិបតីនោះ ពួកគេតែងបង្ហាញវត្តមាននៅរដ្ឋធានី Washington។
លោកViktor អាយុ៧៣ឆ្នាំ និងអ្នកស្រីAmalija Knavs អាយុ៧១ឆ្នាំ ត្រូវបានផ្ដល់សញ្ជាតិអាមេរិកតាមរយៈការធានារបស់កូនស្រី។
តាមCNN ដែលដកស្រង់ប្រភពព័ត៌មានសម្ងាត់មួយឱ្យដឹងថា ជំទាវទី១អាមេរិកបច្ចុប្បន្នបានធ្វើការធានាសុំប័ណ្ណស្នាក់នៅអាមេរិកគ្មានការកំណត់ដល់ឳពុកម្ដាយបង្កើតរបស់ខ្លួន ហើយនេះគឺជាការត្រាយផ្លូវសម្រាប់អ្នកទាំងពីរទទួលបានសញ្ជាតិ។របៀបចូលសញ្ជាតិបែបនេះកំពុងត្រូវបានរដ្ឋការប្រធានាធិបតី Trump ហៅថាជារបៀប«អន្ដោប្រវេសន៍ជាសង្វាក់»ហើយមានបំណងចង់បិទបញ្ចប់គ្រោះនាំការខាតបង់ដល់ប្រទេសអាមេរិក។ មេធាវីខាងលើបានឆ្លើយយ៉ាងខ្លីចំពោះបញ្ហាពាក់ព័ន្ធនឹងករណីនេះថា ខ្ញុំមិនចង់មានយោបល់អំពីទស្សនៈនយោបាយរបស់ប្រធានាធិបតីTrump ទេ ព្រោះចំពោះខ្ញុំ ខ្ញុំមិនឯកភាពនឹងគោលនយោបាយរបស់គាត់៕
សូយន
