ទីភ្នាក់ងារសារព័ត៌មាន Yonhap របស់កូរ៉េខាងត្បូង នៅថ្ងៃទី១០ខែសីហា ឱ្យដឹងថា ទីភ្នាក់ងារទេសចរណ៍ INDPRK របស់ កូរ៉េខាងជើងដែលមានស្នាក់ការនៅចិន បានផ្អាករាល់កញ្ចប់ទេសចរណ៍តាមក្រុមមកកាន់កូរ៉េខាងជើងក្នុងរយៈពេលមួយខែ ចាប់ផ្ដើមពីសប្ដាហ៍នេះទៅ ។
តាមសេចក្ដីប្រកាសរបស់ទីភ្នាក់ងារទេសចរណ៍នេះគេនឹងផ្អាកបណ្ដា Tours ទេសចរណ៍មកកាន់ប្រទេសនេះពីថ្ងៃទី១១សីហា ដល់ថ្ងៃទី៥កញ្ញា ដោយលើកមូលហេតុថា បណ្ដាសណ្ឋាគារនៅព្យុងយ៉ាងត្រូវធ្វើការជួសជុលក្នុងរយៈពេល២០ថ្ងៃ។
ប៉ុន្ដែតាមមជ្ឈដ្ឋានអ្នកសង្កេតការណ៍វិញលើកឡើងថា នេះគឺជាមូលហេតុត្រូវបានលើកឡើងយកលេសប៉ុណ្ណោះ ព្រោះក្នុងអំឡុងពេលនេះនឹងមានដំណើរទស្សសនកិច្ចរបស់ប្រធានរដ្ឋចិន Xi Jinping មកកាន់ក្រុងព្យុងយ៉ាង។
មិនខុសប្លែកពីលើកមុនៗទេ កូរ៉េខាងជើងតែងធ្វើការកំហិតចំនួនភ្ញៀវទេសចរបរទេសចូលមកកាន់ប្រទេសខ្លួនរៀងរាល់ពេល ដែលគេត្រូវរៀបចំបណ្ដាព្រឹត្ដិការណ៍សំខាន់ៗ។ ទន្ទឹមនឹងមូលហេតុខាងលើ ក្រុមអ្នកវិភាគនិយាយបន្ថែមថា ក្រុងព្យុងយ៉ាងកំពុងត្រៀមរៀបចំទិវាអនុស្សាវរីយ៍គម្រប់៧០ឆ្នាំថ្ងៃបង្កើតប្រទេសនេះ៩ខែកញ្ញា ៕
សូយន