ភ្នំពេញ ៖ លោក សាយ សំអាល់ បានដឹកនាំកិច្ចប្រជុំពិភាក្សា ដើម្បីលើកកម្ពស់ ប្រសិទ្ធភាពការងារ និងលើកទិសដៅឆ្នាំ ២០១៩-២០២៣ ដែលមានការអញ្ជើញចូលរួមពីថ្នាក់ដឹកនាំ ចំណុះក្រសួងបរិស្ថាន បណ្តាមន្ទីរបរិស្ថានទាំង២៥រាជធានី-ខេត្ត ក្នុងការជំរុញបន្ថែមក្នុងការរៀបចំផែនការយុទ្ធសាស្ត្រ អនុវត្តលើការគ្រប់គ្រងវិស័យបរិស្ថាន ដល់មន្ត្រីគ្រប់ជំនាញទីស្តីការក្រសួងបរិស្ថាន នៅថ្ងៃទី១០ ខែសីហា ឆ្នាំ២០១៨ ។
នាឱកាសនេះ លោករដ្ឋមន្ត្រី បានលើកទឹកចិត្ត និងជំរុញដល់ថ្នាក់ដឹកនាំដែលកាន់ ឬក៏ធ្វើការសម្រេច ចិត្តលើវិស័យនីមួយៗលើការងារវិស័យបរិស្ថាននេះ សូមបន្តនិងធ្វើការគូសវាសនូវផែនការអភិវឌ្ឍលើការគ្រប់គ្រង ថែរក្សាអភិរក្សធនធានព្រៃឈើ ធនធានជីវចម្រុះ ក៏ដូចជាការលើកកម្ពស់ការយល់ដឹង រួមទាំង កំរិតជីវភាពរបស់ប្រជាសហគមន៍ ក្នុងតំបន់ការពារធម្មជាតិផងដែរ។លោកបានបន្តថា ប្រសិទ្ធភាពការងារល្អ ទាមទារឱ្យមានការចូលរួមទាំងគំនិត មតិយោបល់ និងសកម្មភាពថ្នាក់ដឹកនាំ អគ្គនាយកដ្ឋាន នាយកដ្ឋាន និងបណ្តាមន្ទីរបរិស្ថាន និងមន្ត្រីអនុវត្តទាំងអស់គ្នា ដើម្បីឆ្លើយតបទៅនឹងគោលនយោបាយរបស់ក្រសួងបរិស្ថាន៕ ដោយ ៖ បញ្ញាស័ក្តិ