បុរសអាយុ ៣១ ឆ្នាំម្នាក់ ត្រូវបានបញ្ជូនទៅកាន់មន្ទីរពេទ្យ បន្ទាប់ពីត្រូវបានបង្គោលដែកមួយធ្លាក់បុកទម្លុះកញ្ចក់មុខរថយន្តរបស់គាត់យ៉ាងសាហាវ ខណៈគាត់កំពុងធ្វើដំណើរនៅលើផ្លូវអិក្សប្រេសវ៉េ (TPE) កាលពីថ្ងៃទី៧ ខែសីហា ឆ្នាំ២០១៨ ។
បុរសម្នាក់ឈ្មោះ Rasyid Epvmc បានចែករំលែកពីហេតុការណ៍ដ៏រន្ធត់នេះរបស់ខ្លួននៅលើបណ្តាញសង្គមហ្វេសប៊ុក កាលពីថ្ងៃសុក្រថា៖ «ខណៈកំពុងបើករថយន្តធ្វើដំណើរក្នុងល្បឿន ៧០ គីឡូម៉ែត្រ/ម៉ោង នៅតាមបណ្តោយផ្លូវ TPE ឆ្ពោះទៅកាន់ Punggol នៅពេលនោះស្រាប់តែជួបគ្រោះថ្នាក់ដោយត្រូវបង្គោលដែក១ដើមមិនដឹងធ្លាក់ចេញពីទីណា សំដៅលើរថយន្តរបស់ខ្ញុំតែម្តង» ។ «បង្គោលដែកនេះប្រហែលជាអាវុធហ្វឹកហ្វឺនរបស់ Thor» ។
Rasyid បន្តថា៖ «វាបានបុកទម្លុះកញ្ចក់មុខរថយន្តរបស់ខ្ញុំ ហើយខ្ញុំបានគ្រប់គ្រងបើករថយន្តទៅកាន់ជាយថ្នល់» ។
គាត់បានប្រាប់ Channel 8 News ថា គាត់កំពុងធ្វើដំណើរ នៅពេលនោះគាត់បានឃើញបង្គោលដែកមួយ បានធ្លាក់ចុះសំដៅរថយន្តគាត់ ប៉ុន្តែ គាត់ពុំដឹងថាវាធ្លាក់ចេញមកពីកន្លែងណានោះទេ ។
រូបភាព និងវីដេអូ អមជាមួយការរៀបរាប់របស់គាត់ បានបង្ហាញឲ្យឃើញបង្គោលដែកនោះបានបុកទម្លុះជាប់នឹងកញ្ចក់មុខរថយន្តរបស់គាត់ បណ្តាលឲ្យប្រេះស្រាំ និងបំណែកកំទេចកំទីកញ្ចក់រាយប៉ាយនៅក្នុងរថយន្ត ។
ប៉ូលីសនិយាយថា ពួកគេត្រូវបានជូនដំណឹងអំពីហេតុការណ៍នេះ នៅវេលាម៉ោងប្រហែល ៥ ល្ងាច ហើយថា បុរសម្នាក់ត្រូវបានបញ្ជូនទៅកាន់មន្ទីរពេទ្យ Khoo Teck Puat ដោយមានស្មារតីនឹងនរ ។
បច្ចុប្បន្ន ការស៊ើបអង្កេតរបស់ប៉ូលីសកំពុងបន្ត ៕ ឧត្តម (channelnewsasia)