រថយន្តការពារគ្រាប់ សម្រាប់ដឹកលុយរបស់ក្រុមហ៊ុនដឹកជញ្ជូន Brinks បានរបើកទ្វារក្រោយ តាមថ្នល់ជាតិ នៅក្រុង Indianapolis ចំណុះរដ្ឋ Indiana អាមេរិក ធ្វើឲ្យកញ្ចប់ផ្ទុកលុយរាប់ម៉ឺនដុល្លារ ធ្លាក់ចុះមកលើថ្នល់ ។
ស្ថានីយ៍ FOX 8 បានដកស្រង់សម្តីអ្នកនាំពាក្យមន្ត្រីប៉ូលិសរដ្ឋ Indiana , John Perrine ឲ្យដឹងថា មិនដឹងមូលហេតុអ្វីទេ ដែលទ្វារក្រោយរបស់រថយន្តបានរបើក នៅវេលាម៉ោង ៣និង៥០នាទី (ម៉ោងតំបន់) ហើយមានលុយប៉ុន្មាន បានជ្រុះធ្លាក់ ។ ជាបឋមតាមការប៉ាន់ស្មានគឺតួលេខនេះប្រហែល 600.000 USD ។
មានអ្នកបើកបររថយន្តមួយចំនួន បានឈប់រថយន្តដើម្បីរើសលុយ “ធ្លាក់ចុះពីលើមេឃ” ខណៈពេលពលរដ្ឋមួយចំនួនក៏បាននាំគ្នាមករើសផងដែរ ។
លោក Perrine ឲ្យដឹងថា ពេលនេះប៉ូលិស កំពុងរុករកអ្នកឈប់រថយន្ត “ឆ្លៀតឱកាស” ហើយក៏ប្រកាសឲ្យអ្នកបើកលុយទាំងប៉ុន្មានយកលុយមកសងវិញ ពុំនោះសោតនឹងត្រូវប្រឈមនឹងបទចោទប្រកាន់ចោរកម្ម ។
ប៉ូលិសមានលេខរថយន្តរបស់ជនឆ្លៀតឱកាសទាំងអស់ដែលបានឈប់រើសលុយ ហើយក៏អំពាវនាវដល់អ្នក “ជ្រុលដៃ” រើសយកលុយទាំងនោះ ទាក់ទងមន្ទីរប៉ូលិសដើម្បីប្រគល់សងវិញផងដែរ ។
នេះជាលើកទី២ ហើយដែលរថយន្តក្រុមហ៊ុន Brinks កើតមានហេតុការណ៍ “ចម្លែក” ។ មុននោះនៅថ្ងៃទី ២៨ ខែមេសា ចោរប្លន់ប្រដាប់អាវុធ ២នាក់ បានរារាំងរថយន្តរបស់ Brinks នៅទីក្រុង Hammond រដ្ឋ Indiana ហើយយកលុយបាន ៥០០.០០០ ដុល្លារ ៕ ចន្ទ្រា