ខេត្តក្រចេះ ៖ ករណីឆេះផ្ទះស្លាប់មួយគ្រួសារមានគ្នា៤នាក់ ដែលជំហានដំបូងសមត្ថកិច្ចសង្ស័យថា ជាអំពើឃាតកម្ម ។ ហេតុការណ៍ នេះ កើតឡើងនៅចំណុចកោះប្រឹម ភូមិប្អៀរ ឃុំថ្មី ស្រុកចិត្របុរី ខេត្តក្រចេះ។ ករណីខាងលើនេះ សមត្ថកិច្ច សន្និដ្ឋានទំនងអាច កើតឡើង រយៈពេលពីរបីថ្ងៃមកហើយ។
សមត្ថកិច្ចបន្តថា ៖ ក្នុងនោះមានជនរងគ្រោះ មាន៤នាក់ ទី១ ៖ ឈ្មោះឆុំ ឈាន ភេទប្រុស អាយុ៣០ឆ្នាំ ត្រូវជាឪពុក។ ទី២ ៖ ឈ្មោះជួន សុខនាង ភេទស្រី អាយុ៣៦ឆ្នាំ ត្រូវជាប្រពន្ធ ។ ទី៣ ៖ ឈ្មោះឈាន ភឹមសី ភេទប្រុស អាយុ១១ឆ្នាំ ត្រូវជាកូន។ ទី៤ ៖ ឈ្មោះឈាន វណ្ណី ភេទស្រី អាយុ៩ឆ្នាំ ត្រូវជាកូន។ គេកំពុងឆ្ងល់ថា ហេតុអ្វីក្រុមគ្រួសារមួយនេះ មករស់នៅក្នុងព្រៃ ហើយគ្មានសាច់ញាតិ និងអ្នកនៅជិតខាងណាងដឹងថា មានសាច់ញាតិនៅទីណាទេ ហើយហេតុអ្វីគេបាញ់សម្លាប់ចោល រួចដុតផ្ទះថែមទៀត ឬមួយក៏ជាក្រុមគ្រួសារ មានបញ្ហាមិនល្អកន្លងមកទេដឹង។
មន្រ្តីនគរបាល បានឱ្យដឹងថា ក្រោយទទួលដំណឹងភ្លាម កាលពីល្ងាចថ្ងៃទី១១សីហា កម្លាំងនគរបាលជំនាញបច្ចេកទេស និងនគរបាលព្រហ្មទណ្ឌ បានចុះទៅកន្លែងកើតហេតុ តែភ្លៀងខ្លាំងពេក ហើយទូកមិនហ៊ានឆ្លង ព្រោះកន្លែងកើតហេតុនៅឆ្ងាយ ពីភូមិជាង៥គីឡូម៉ែត្រ ទើបនៅព្រឹកថ្ងៃទី១២សីហានេះ កម្លាំងនគរបាល បានចុះទៅដល់កន្លែងកើតហេតុ ប្រទះឃើញផ្ទះឆេះអស់ និងមានសាកសព៤នាក់ខ្លោចដូចធ្យូង។
ករណីនេះដែរ មកដល់ពេលនេះ ជនសង្ស័យមិនទាន់បានស្គាល់អត្តសញ្ញាណនៅឡើយទេ បើគិតត្រឹមល្ងាចថ្ងៃទី១២ ខែសីហា នេះ ។ សមត្ថកិច្ចសន្និដ្ឋានថា ក្រោយពីជនសង្ស័យធ្វើសកម្មភាព សម្លាប់ជនរងគ្រោះរួចហើយ ក៏បានដុតផ្ទះ និងសាកសព ដើម្បីបង្វែងដាន ជាគ្រោះអគ្គិភ័យ។
នៅកន្លែងកើតហេតុគេបានប្រទះឃើញមានសំបកកាំភ្លើង ដែលជាតម្រុយក្នុងការស៊ើបអង្កេត របស់សមត្ថកិច្ចផងដែរ។ សមត្ថកិច្ចទទួលព័ត៌មាន ពីប្រជាពលរដ្ឋប្រទះឃើញ ហើយរាយការណ៍ដល់កម្លាំងសមត្ថកិច្ច។
មកដល់ពេលនេះសាកសព ជនរងគ្រោះទាំង៤ត្រូវ សមត្ថកិច្ចក៏បានរៀបចំប្រមូលបញ្ចុះ ទុកបណ្តោះអាសន្ន រង់ចាំស្រាវជ្រាវរកសាច់ញាតិជាក្រោយ។
នៅព្រឹកថ្ងៃទី១២ ខែសីហា ឆ្នាំ២០១៨នេះថា ដំណឹងនេះ បានទទួលពីលោកគ្រូបង្រៀនម្នាក់ ដែលគាត់បានប្រាប់ថា គ្រួសារជនរងគ្រោះនោះ រស់នៅក្នុងខ្ទមមួយដាច់ស្រយ៉ាលពីគេ ហើយមានកូនចំនួន២នាក់ រៀនជាមួយគាត់។
លោកគ្រូបានបន្តថា ក្រោយមិនឃើញកូនសិស្សទាំង២នាក់ ទៅរៀនចំនួន២-៣ថ្ងៃនោះ ទើបគាត់មានការព្រួយបារម្ភ ខ្លាចលង់ទឹក ព្រោះរដូវនេះជារដូវទឹកជំនន់ផង លោកគ្រូក៏បានហៅក្រុមប្រជាការពារភូមិ ចុះទៅពិនិត្យមើល តែពេលទៅដល់ខ្ទមនោះ ក៏ឃើញត្រូវភ្លើងឆេះអស់ ហើយមនុស្សទាំង៤នាក់ (ឪពុកម្តាយ និងកូនៗទាំង២នាក់) បានស្លាប់នៅកន្លែងកើតហេតុ៕ ដោយ ៖ បញ្ញាស័ក្តិ