ខេត្តព្រះសីហនុ ៖ លោកឧត្តមសេនីយ៍ទោជួន ណារិន្ទស្នងការនគរបាល ខេត្តព្រះសីហនុ មានប្រសាសន៍ថា កម្លាំងនគរបាលខេត្តព្រះសីហនុ សហការជាមួយ កម្លាំងនគរបាលខេត្តកំពត បានបង្ក្រាប និងឃាត់ខ្លួនជនសង្ស័យចំនួន៣នាក់ ពាក់ពន្ធ័បទល្មើសឆក់ យកទ្រព្យសម្បត្តិជនជាតិចិន នៅខេត្តព្រះសីហនុ ហើយបានរត់គេចខ្លួន ទៅខេត្តកំពត។
លោកឧត្តមសេនីយ៍ស្នងការបន្តថា កាលពីថ្ងៃទី១១ ខែសីហា ឆ្នាំ២០១៨ វេលាម៉ោង ១៨ និង៣០នាទី នៅចំណុចឆ្នេរអូរត្រេះ ភូមិ៦ សង្កាត់៤ ក្រុង-ខេត្តព្រះសីហនុ មានករណី អំពើលួចមានស្ថានទម្ងន់ទោស (ឆក់ជនជាតិចិន ) មួយករណីបង្កឡើងដោយ ជនសង្ស័យចំនួន ០៣នាក់ មិនស្គាល់ឈ្មោះ បានជិះម៉ូតូ ០១គ្រឿង មិនស្គាល់ម៉ាក បានធ្វើ សកម្មភាពឆក់ជនជាតិចិនកំពុងដើរ តាមផ្លូវ រួចក៏គេចខ្លួនបាត់។
លោក ជួន ណារិន្ទ បានបន្តថា បន្ទាប់ពីបានទទួលដំណឹង នៃបទល្មើសនេះភ្លាម កម្លាំងជំនាញផែននគរបាលព្រហ្មទណ្ឌ ក៏បានចុះស្រាវជ្រាវ រហូតដឹងថា ជនសង្ស័យខាងលើ បានជិះម៉ូតូទៅខេត្តកំពត ភ្លាមនោះកម្លាំងនគរបាល បានធ្វើការសហការជាមួយកម្លាំងជំនាញស្នងការដ្ឋាននគរបាល ខេត្តកំពត ដើម្បីស្ទាក់ចាប់ជនសង្ស័យបានទាំង៣នាក់។
សមត្ថកិច្ចឲ្យដឹងថា នរងគ្រោះជាជនជាតិចិន ( មិនស្គាល់អត្តសញ្ញាណ ) ក្រោយពេលកើតហេតុ ជនរងគ្រោះមិនបានមកដាក់ពាក្យបណ្តឹងឡើយ។
ចំណែក ជនសង្ស័យទាំ០៣នាក់ ដែលសមត្ថកិច្ចចាប់ខ្លួនរួមមាន៖
១-ឈ្មោះ កប ផានិត ភេទប្រុស អាយុ ១៦ឆ្នាំ មុខរបរ កម្មករសំណង់ មានទីលំនៅ ភូមិល្អាង ឃុំល្អាង ស្រុកដងទង់ ខេត្តកំពត ។
២-ឈ្មោះ កេង ណារ័ត្ន ភេទប្រុស អាយុ ១៧ឆ្នាំ មុខរបរ ជាងពិដាន មានទីលំនៅ ភូមិដំណាក់ចង្អើរ សង្កាត់ព្រៃធំ ក្រុងកែប ខេត្តកែប។
៣-ឈ្មោះ ប៉ាញ ក្តៀង ភេទប្រុស អាយុ ២៥ឆ្នាំ មុខរបរ ជាងថ្នាំ មានទីលំនៅ ភូមិ៣ សង្កាត់៣ ក្រុង-ខេត្តកំពត ។
+វត្ថុតាងចាប់យកបានរួមមាន៖
-ទូរស័ព្ទដៃ ០៩ គ្រឿង
-ម៉ូតូ ០១គ្រឿង ម៉ាក អិចសិចទ័រ ពណ៌ក្រហម ( មធ្យោបាយធ្វើសកម្មភាព )
-ម៉ូតូ ០១គ្រឿង ម៉ាក ZOOMER X ( មធ្យោបាយធ្វើសកម្មភាព ) ។
ករណីនេះ កម្លាំងនគរបាលខេត្តព្រះសីហនុ កំពុងបន្តនីតិវិធីនៅការិយាល័យនគរបាលព្រហ្មទណ្ឌខេត្តព្រះសីហនុ៕ ដោយ ៖ ដែនសីមា
