បាត់ដំបង ៖ ក្រុមអន្តរាគមន៍បង្ការ បង្ក្រាប នៃស្នងការដ្ឋាននគរបាលខេត្តបាត់ដំបង សហការជាមួយកម្លាំងនគរបាលស្រុកស្វាយលើ ខេត្តសៀមរាប ចុះប្រត្តិបត្តិការនាំខ្លួនជនសង្ស័យចំនួន ២នាក់ ដែលពាក់ពន្ធ័ករណី អំពើលួចមានស្ថានទម្ងន់ទោស កាច់សោម៉ូតូ ។
ក្រុមអន្តរាគមន៍ បង្ការ បង្ក្រាប នៃស្នងការដ្ឋាននគរបាលខេត្តបាត់ដំបង បានឲ្យដឹងថា ក្រុមអន្តរាគមន៍ដោយអនុវត្តន៍ តាមការណែនាំបញ្ជាផ្ទាល់ ពីលោកឧត្តមសេនីយ៍ទោ អ៊ុច សុខុន ស្នងការនគរបាលខេត្តបាត់ដំបង នៅថ្ងៃអាទិត្យ ទី១២ ខែសីហា ឆ្នាំ២០១៨ លោកឧត្តមសេនីយ៍ត្រី ជេត វណ្ណនី ស្នងការរងនគរបាលទទួលបន្ទុកផែនព្រហ្មទណ្ឌ បានដឹកនាំកម្លាំងក្រុមអន្តរាគមន៍បង្ការ បង្ក្រាប សហការជាមួយកម្លាំងនគរបាលស្រុកស្វាយលើ ខេត្តសៀមរាប ចុះប្រត្តិបត្តិការនាំខ្លួនជនសង្ស័យចំនួន ២នាក់ ដែលពាក់ពន្ធ័ករណី អំពើលួចមានស្ថានទម្ងន់ទោស ( កាច់សោម៉ូតូ ) កាលពីខែ មិថុនា ឆ្នាំ២០១៨ នៅចំណុចភូមិអូរគ្រួស ឃុំសេរីមានជ័យ ស្រុកសំពៅលូន ខេត្តបាត់ដំបង ។ ជនសង្ស័យពីរនាក់ ១ ឈ្មោះ ឆាយ រាជ ភេទប្រុស អាយុ ២៤ឆ្នាំ មានទីលំនៅភូមិអូរគ្រួស ឃុំសេរីមានជ័យ ស្រុកសំពៅលូន ខេត្តបាត់ដំបង ។ ២ ឈ្មោះ ចិន វ៉ាត ភេទប្រុស អាយុ ៤១ឆ្នាំ មានទីលំនៅភូមិចម្រេះ ឃុំស្វាយលើ ស្រុកស្វាយលើ ខេត្តសៀមរាប។
ក្រោយពីជនសង្ស័យទាំង២នាក់ បានធ្វើសកម្មភាពរួចក៏បានរត់គេច ទៅសម្ងំលាក់ខ្លួននៅក្នុងស្រុកស្វាយលើ ខេត្តសៀមរាប រហូតដល់ថ្ងៃទី ១២ សីហា ២០១៨ ទើបកម្លាំងអធិការដ្ឋាននគរបាលស្រុកស្វាយលើ ធ្វើការឃាត់ខ្លួនទាំង២នាក់ ។
នៅចំពោះមុខសម្ថកិច្ចជនសង្ស័យ បានឆ្លើយសារភាពថា កាលពីខែមិថុនា ឆ្នាំ២០១៨ វេលាម៉ោងប្រហែល ១២រំលងអធ្រាត្រ ខ្លួនបានធ្វើសកម្មភាព ដាក់ថ្នាំបំពុលជាមួយសាច់គោ ឲ្យឆ្កែស៊ី បន្ទាប់មកម្ចាស់ផ្ទះដេកលក់អស់ មើលទៅមានឱកាសល្អ ខ្លួនក៏បានធ្វើសកម្មភាពចូលទៅកាច់សោម៉ូតូ ដែលម្ចាស់ផ្ទះទុកនៅសំយាបខាងមុខ ហើយក៏បានជិះគេចខ្លួនបាត់។
វត្ថុតាងដកហូតរួមមាន៖ ដែកច្នៃសម្រាប់កាច់សោម៉ូតូចំនួន១ ទួណឺវីសចំនួន៣ ដង្កាប់ចំនួន១ សោសម្រាប់ដោះចំនួន៥
ទូរស័ព្ទដៃចំនួន១ ម៉ូតូមួយគ្រឿងម៉ាកហុងដាឌ្រីម C125 ពណ៌ខ្មៅ ស៊េរីឆ្នាំ២០១៨ ពាក់ស្លាកលេខ បាត់ដំបង 1AD 1372។
បច្ចុប្បន្នជនសង្ស័យរួមទាំងវត្ថុតាងខាងលើ ក្រុមអន្តរាគមន៍បង្ការ បង្ក្រាប បានប្រគល់ឲ្យទៅការិយាល័យជំនាញ ដើម្បីចាត់ការតាមនីតិវិធី៕ ដោយ ៖ បញ្ញាស័ក្តិ