ខេត្តព្រះសីហនុ ៖ ប្រធានមន្ទីរពេទ្យបង្អែកខេត្តព្រះសីហនុ គឺលោកវេជ្ជបណ្ឌិត សេង ណុង បង្ហាញអារម្មណ៍រីករាយ និងបានថ្លែងអំណរគុណ ដល់សប្បុរសជននានា ដែលបានបរិច្ចាគឈាមជូន មន្ទីរពេទ្យបង្អែកខេត្តព្រះសីហនុ។
លោកវេជ្ជបណ្ឌិតបន្តថា កាលពីថ្ងៃទី១១ ខែសីហា ឆ្នាំ២០១៨ លោក ឧកញ៉ា វណ្ណ សុខហេង ប្រធានសម្ព័ន្ធសមាគមសហគ្រាសធុនតូច និងមធ្យម សាខាខេត្តព្រះសីហនុ ឬហៅកាត់ (FASMEC) បានដឹកនាំសមាជិកសមាជិការចំនួន៣៥នាក់ មកចូលរួមបរិច្ចាគឈាមជូនដល់មន្ទីរពេទ្យនេះ។
លោកថា មានស្ថាប័នចំនួន៥ រួមមាន៖ Idea Source, ABA, RHB, CMTC, LCF បានមកបរិច្ចាគឈាម ជូនដល់មន្ទីរពេទ្យបង្អែកខេត្តព្រះសីហនុ កាលពីថ្ងៃទី១១ ខែសីហា ឆ្នាំ២០១៨។
ផ្តើមពីបញ្ហានេះ លោកវេជ្ជបណ្ឌិត សេង ណុង មានប្រសាសន៍ក្នុងនាមប្រធានមន្ទីរពេទ្យ ក៏ដូចជាក្នុងនាមអ្នកជំងឺ សូមថ្លែងអំណរ គុណយ៉ាងជ្រៅ ចំពោះទឹកចិត្តដ៏សប្បុរស របស់ លោក ឧកញ៉ា វណ្ណ សុខហេង និងសមាជិកសមាជិការ របស់ស្ថាប័ន និងសហគ្រាសពាក់ព័ន្ធទាំងអស់ នៃFASMEC ដែលបានចូលរួមបរិច្ចាគឈាម ដោយស្ម័គ្រចិត្ត ជូនដល់មន្ទីរពេទ្យបង្អែកខេត្តព្រះសីហនុ ដើម្បីអោយមន្ទីរពេទ្យនេះ មានលទ្ធភាពជួយសង្គ្រោះអ្នកជំងឺ ដែលត្រូវការឈាមជាចាំបាច់ បានទាន់ពេលវេលា។
លោកវេជ្ជបណ្ឌិត សេង ណុង បានចាត់ទុកការចូលរួមរបស់វិស័យឯកជន ក្នុងកិច្ចមនុស្សធម៌ជួយដល់សង្គម តាមរយៈការបរិច្ចាកឈាមនាឱកាសនេះ ថាជាកិច្ចការដ៏ល្អប្រពៃបំផុត។
ត្រង់ចំណុចនេះ លោកវេជ្ជបណ្ឌិត សង្ឃឹមថា នៅពេលខាងមុខ អាចមានស្ថាប័ន សហគ្រាស់ផ្សេងៗទៀត នឹងមកចូលរួមបរិច្ចាគឈាម ជូនដល់មន្ទីរពេទ្យជាបន្តបន្ទាប់ទៀត។
លោកឧកញ៉ា វណ្ណ សុខហេង ប្រធានសម្ព័ន្ធសមាគមសហគ្រាសធុនតូច និងមធ្យម សាខាខេត្តព្រះសីហនុ កាលពីថ្ងៃព្រឹកថ្ងៃសៅរ៍ ទី១១ ខែសីហា ឆ្នាំ២០១៨ បានដឹកនាំសមាជិកសមាជិការ ឬវិស័យឯកជន ចំនួន៥អង្គភាពចំនួន ៣៥នាក់ ទៅបរិច្ចាគឈាម ជូនមន្ទីរ ពេទ្យបង្អែកខេត្តព្រះសីហនុ។
លោកឧកញ៉ាបន្តថា ការដឹកនាំសមាជិកសមាជិកា របស់សម្ព័ន្ធសមាគម ទៅផ្តល់ឈាមជូនមន្ទីរពេទ្យបង្អែកខេត្តព្រះសីហនុពេលនេះ ក្នុងន័យការងារមនុស្សធ៌ម ដើម្បីរួមចំណែកជួយសង្គ្រោះអាយុជីវិតមនុស្ស ជាពិសេសអ្នកជំងឺក្រីក្រ ដែលត្រូវការឈាមចាំបាច់សម្រាប់សង្គ្រោះជីវិត។
ឧកញ៉ា វណ្ណ សុខហេង បន្តថា ការផ្តល់ឈាម របស់ក្រុមការងារសម្ព័ន្ធសមាគមសហគ្រាសធុនតូច និងមធ្យមខេត្តព្រះសីហនុពេល នេះ គឺធ្វើឡើងក្នុងនាមមនុស្សធម៌ជួយដល់សង្គម តាមរយៈវិស័យឯកជន ដើម្បីរួមចំណែកកាត់បន្ថយភាពក្រីក្រជូនប្រជា ពលរដ្ឋ ជាមួយប្រមុខដឹកនាំរាជរដ្ឋាភិបាលកម្ពុជា។
លោកឧកញ៉ា វណ្ណ សុខហេង ដែលជានាយកសាលាអាយដៀស៊សស្តង់ដារជាតិ និងអន្តរជាតិ ប្រចាំខេត្តព្រះសីហនុផងនោះ បាន ចាត់ទុកការផ្តល់ឈាម ថាជាការផ្តល់ក្តីសង្ឃឹមមួយ ដើម្បីជួយសង្គ្រោះជីវិតមនុស្ស និងផ្តល់ស្នាមញញឹមជាថ្មីដល់ជនរងគ្រោះ ឬអ្នកជំងឺ..៕ ដោយ ៖ ដែនសីមា