ស្ត្រី MC សញ្ជាតិអង់គ្លេស Kirstie Allsopp និងស្វាមី មានទ្រព្យសម្បត្តិប្រមាណ ១៦លានផោន ។ ពួកគាត់គិតថា នឹងទុកទ្រព្យសម្បត្តិទាំងអស់ឲ្យកូន តែមានលក្ខខណ្ឌមួយគត់ប៉ុណ្ណោះ ។
នាងជាភរិយាពោលថា ៖ អ្វីៗដែលជាសំណាងរបស់កូនប្រុសទាំង២ គឺនឹងមានទ្រព្យមរតកបន្សល់ទុកឲ្យ ។ ប៉ុន្តែពុំបានទទួលមួយកាក់មួយសេនអ្វីទាំងអស់ ប្រសិនបើពុំមានមុខរបរ ពុំបញ្ចេញពលកម្មធ្វើការទេនោះ ។
លុយទាំងនេះ គ្រាន់តែដើម្បី កុំឲ្យពួកវាបារម្ភគិតគូរពីរឿងហូបចុក ស្លៀកពាក់ ស្នាក់នៅប៉ុណ្ណោះ តែត្រូវរៀនសូត្រ រៀនអ្វីក៏បានតាមចំណូលចិត្ត និងត្រូវធ្វើការងារ ។ នេះឯងជាលក្ខខណ្ឌ ។
MC Kirtie និងកូនប្រុសទាំង២នាក់
នាងបន្តថា “ខ្ញុំនឹងសប្បាយចិត្តណាស់ ប្រសិនកូនខ្ញុំធ្វើគ្រូបង្រៀននៅសាលាណាមួយ ហើយខ្ញុំបានស្ថិតនៅក្បែរវាពេលចាស់ទៅ ។ ខ្ញុំរីករាយនឹងជួយមើលថែកូនៗ របស់ពួកវា ។ នេះជាសុបិន្តរបស់ខ្ញុំ និងស្វាមី ។
ងាកមកតារាៗល្បីៗវិញ ជាអាទិ៍ ៖
-តារាចម្រៀង Elton John អាយុ ៧១ឆ្នាំ និយាយថា ៖ ខ្ញុំមិនចង់ឲ្យកូនៗរបស់ខ្ញុំមានលុយច្រើនពេកទេ ព្រោះខ្លាចថា លុយនឹងធ្វើឲ្យខូចជីវិតរបស់ពួកវា ។ ខ្ញុំនឹងសាងគ្រឹះហិរញ្ញវត្ថុសមល្មមមួយសម្រាប់កូនម្នាក់ៗប៉ុណ្ណោះ ។
-ផលិតករទូរទស្សន៍អង់គ្លេស Simon Cowell អាយុ ៥៨ឆ្នាំវិញ ប្រកាសថា ទ្រព្យសម្បត្តិតម្លៃប្រមាណ ៣២៥ លានផោនរបស់ខ្លួន នឹងមិនប្រគល់ឲ្យកូនប្រុសតែ១គត់ទេ ! ព្រោះខ្ញុំពុំជឿថា ទ្រព្យសម្បត្តិអាចរក្សាបានតាមរបៀបតំណពូជទេ ។ ខ្ញុំនឹងរំលែកទៅឲ្យមូលនិធិសប្បុរសធម៌ ។
-តារាតន្ត្រីអង់គ្លេស -Sting អាយុ ៦៦ ឆ្នាំ ក៏អះអាងថា លោកនឹងមិនប្រគល់ទ្រព្យសម្បត្តិ ១៨០លានផោនឲ្យទៅកូនទាំង ៦នាក់ ទាំងអស់នោះទេ ។
កំពូលសេដ្ឋីពិភពលោក Bill Gide ធ្លាប់ប្រកាសថា ៖ “លុយពុំបានធ្វើឲ្យមនុស្សក្លាយជាល្អទេ ! ” ។ កូនៗរបស់លោកប្រហែលជាទទួលបានលំនៅដ្ឋានម្នាក់១ និងលុយ ១០លានដុល្លារ ក្នុងម្នាក់ៗប៉ុណ្ណោះ ខណៈពេលដែលទ្រព្យសម្បត្តិរបស់លោកមានដល់ទៅក្បែររយពាន់លានដុល្លារឯណោះ ។ ជាក់ស្តែងលោកកំពុងចែកចាយស្ទើពាក់កណ្តាលហើយឲ្យទៅមូលនិធិសាធារណៈផ្សេងៗ ៕ ចន្ទ្រា
