ក្រចេះ ៖ ជនសង្ស័យចំនួន៤នាក់ ពាក់ព័ន្ធករណីសម្លាប់មនុស្សមួយគ្រួសារ ហើយដុតផ្ទះបំផ្លាញភស្ដុតាង ត្រូវបានកងកម្លាំងនគរបាល និងកម្លាំងអាវុធហត្ថខេត្តក្រចេះ។
កម្លាំងសមត្ថកិច្ច បានបញ្ជាក់ថា ប្រតិបត្តិការចាប់ខ្លួនជនសង្ស័យទាំង៤នាក់នេះ ត្រូវបានធ្វើឡើងនៅល្ងាចថ្ងៃទី១២ ខែសីហា ឆ្នាំ២០១៨ ដោយមានការសហការគ្នារវាង កម្លាំងនគរបាល និងកម្លាំងអាវុធហត្ថដោយស្រាវជ្រាវយ៉ាងយកចិត្តទុកដាក់ ក្រោមការ សម្របសម្រួលពីព្រះរាជអាជ្ញាអមសាលាដំបូងខេត្ត។ ជនសង្ស័យទាំង៤នាក់នោះរួមមាន ទី១ ឈ្មោះ ចឹក ណូ ភេទប្រុស អាយុ៥០ឆ្នាំ ទី២ឈ្មោះ ចឹក លឹមស្រេង ភេទប្រុស អាយុ២២ឆ្នាំ ទី៣ឈ្មោះ ចឹក ម៉ៅ ភេទប្រុស អាយុ៤៦ឆ្នាំ អ្នកទាំងបីរស់នៅភូមិបកអៀ ឃុំថ្មី ស្រុកចិត្របុរី ខេត្តក្រចេះ និងទី៤ឈ្មោះ ម៉ៅ ញ៉ាញ់ ភេទប្រុស អាយុ១៧ឆ្នាំ មានទីលំនៅភូមិ ក្បាល ឃុំជេសរជ្រៃ ស្រុកចំការលើ ខេត្តកំពង់ចាម។ ជនសង្ស័យត្រូវបានបញ្ជូន ទៅកាន់ការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តក្រចេះ ដើម្បីធ្វើការសួរនាំ និងចាត់ការបន្ដតាមនីតិវិធី។
ករណីឃាតកម្មនេះកើតឡើងកាលពីយប់ថ្ងៃទី៩ ខែសីហា ឆ្នាំ២០១៨ នៅចំណុចភូមិប្អៀ ឃុំថ្មី ស្រុកចិត្របុរី ខេត្តក្រចេះ។ កម្លាំងនគរបាលជំនាញ បានទទួលពីលោកគ្រូបង្រៀនម្នាក់ ដែលគាត់បានប្រាប់ថា គ្រួសារជនរងគ្រោះនោះ រស់នៅក្នុងខ្ទមមួយដាច់ស្រយ៉ាលពីគេ ហើយមានកូនចំនួន២នាក់រៀនជាមួយគាត់។
លោកគ្រូបានបន្តថា ក្រោយមិនឃើញកូនសិស្សទាំង២នាក់ទៅរៀនចំនួន២-៣ថ្ងៃនោះ ទើបគាត់មានការព្រួយបារម្ភ ខ្លាចលង់ទឹកព្រោះរដូវនេះជារដូវទឹកជំនន់ផង លោកគ្រូក៏បានហៅក្រុមប្រជាការពារភូមិ ចុះទៅពិនិត្យមើល តែពេលទៅដល់ខ្ទមនោះ ក៏ឃើញត្រូវភ្លើងឆេះអស់ ហើយមនុស្សទាំង៤នាក់ (ឪពុកម្តាយ និងកូនៗទាំង២នាក់) បានស្លាប់នៅកន្លែងកើតហេតុ៕ ដោយ ៖ បញ្ញាស័ក្តិ
