វីដេអូគួរឲ្យតក់ស្លុតមួយ ដែលបានបង្ហាញឲ្យឃើញស្ត្រីស្បែកខ្មៅម្នាក់ ត្រូវបានបុរសម្នាក់ដាល់១ដៃចំមុខ ស្ថិតនៅមុខហាងកែសម្ផស្ស Oklahmoma បានធ្វើឲ្យមនុស្សជាច្រើនផ្ទុះកំហឹងយ៉ាងខ្លាំង ។
យោងតាម Shaun King សកម្មជន និងជាសហស្ថាបនិកនៃអង្គការសិទ្ធិស៊ីវិល Real Justice នោះហេតុការណ៍នេះបានកើតឡើងនៅមុខហាងកែសម្ផស្សរបស់បុរសម្នាក់ឈ្មោះ Jun ស្ថិតនៅ Tulsa, Oklahoma ។
King បានពន្យល់ថា កូនក្មេងម្នាក់ដែលត្រូវបានសន្មត់ថា ជាងក្មេងម្នាក់ក្នុងចំណោម២នាក់នៅក្នុងវីដេអូ បានដើរចេញពីក្នុងហាងនោះជាមួយបន្តោងសោរមួយ ។ ស្ត្រីម្នាក់បានចាប់ក្មេងស្រីនោះជាមួយបន្តោងសោរ និងប្រគល់វាវិញ ។ ទោះយ៉ាងណា បុរសម្នាក់បានចេញពីក្នុងហាង និងដើរតាមរករឿងនាង និងប្រាប់ទៅនាងថា «នាងត្រូវចេះបើកភ្នែកមើលកូនៗរបស់នាងឲ្យបានល្អផង» ។
ស្ត្រីបានងាកមកប្រឈមមុខជាមួយបុរសនោះ ហើយពួកគេក៏ចាប់ផ្តើមផ្ទុះពាក្យសម្តីខ្លាំងៗដាក់គ្នា ។ ស្ត្រីនោះបន្ទាប់មក អាចត្រូវបានឃើញងាកប្រុងចាកចេញ ដោយបានរុញស្មាបុរសនោះ ។ ប៉ុន្តែ ភ្លាមៗនោះ បុរសរូបនេះក៏បានដាល់នាង១ដៃចំមាត់មួយទំហឹងតែម្តង ។
ស្ត្រីរងគ្រោះ ភ្លាមៗនោះ ត្រូវបានឃើញយកដៃខ្ទប់មាត់របស់នាងពោរពេញទៅដោយឈាម ដែលជាលទ្ធផលនៃការប្រើកណ្តាប់ដៃរបស់បុរសនោះ ។
យោងតាម Yahoo News បុរសនៅក្នុងវីដេអូនេះ ត្រូវបានស្គាល់មានឈ្មោះថា Changseok Jun ជាម្ចាស់ហាងកែសម្ផស្សខាងលើនេះ ។
បន្ទាប់ពីហេតុការណ៍នេះបានកើតឡើង Jun ត្រូវបានចោទប្រកាន់ប្រើអំពើហិង្សា ហើយតុលាការកំណត់ពេលឲ្យជនបង្ករូបនេះចូលខ្លួននៅថ្ងៃទី១២ ខែកញ្ញា ដើម្បីប្រឈមមុខនឹងការផាកពិន័យ ឬ សេវាសហគមន៍ ។ ជនរងគ្រោះដែលនៅតែពុំស្គាល់អត្តសញ្ញាណ អាចប្តឹងប្រឆាំង Jun ផងដែរ ៕ ឧត្តម (nextshark)
