កូនក្រមុំហ្វីលីពីនម្នាក់ បានកំពុងធ្វើឲ្យរំជួលបេះដូងអ្នកលេងអ៊ីនធើរណេតជាច្រើនយ៉ាងខ្លាំង បន្ទាប់ពីវីដេអូមួយបានបង្ហាញនាងដើរទាំងឈុតអាពាហ៍ពិពាហ៍ នៅក្នុងព្រះវិហារលិចលង់ដោយទឹកជំនន់ បានរីករាលដាលនៅលើហ្វេសប៊ុក ។
ខណៈដ៏អស្ចារ្យនេះ ត្រូវបានថតកាលពីថ្ងៃអាទិត្យ ស្ថិតក្នុងទីក្រុង Hagonoy ខេត្ត Bulacan ។
យោងតាម AFP ដកស្រង់ពី AsiaOne កូនក្រមុំឈ្មោះ Jobel Delos Angeles បានរៀបការជាមួយដៃគូរបស់នាង ដែលបានបង្កើតចំណងស្នេហ៍នឹងគ្នា ៧ ឆ្នាំ កាលពីសប្តាហ៍មុន ទោះបីភ្ញៀងនៅតែបន្តដែលកើតមានដោយព្យុះ Yagi និងខ្យល់ម៉ូសុងនៅភាគនិរតី ដែលបានបង្កជាទឹកជំនន់ធ្ងន់ធ្ងរនៅក្នុងតំបន់ Manila ក៏ដូចជាខេត្តជិតខាងដូចជា Bulacan ។
ក្នុងវីដេអូដែលត្រូវបានបង្ហោះលើអ៊ីនធើរណេតដោយមីងរបស់នាងឈ្មោះ Teresa Bautista កូនក្រមុំវ័យ ២៤ ឆ្នាំ នេះត្រូវបានឃើញដើរលុយកាត់ទឹកយ៉ាងក្លាហាននៅក្នុងព្រះវិហារ ទាំងឈុតអាពាហ៍ពិពាហ៍ ដែលធ្វើឲ្យគ្រប់គ្នាឃើញហើយគួរឲ្យស្រណោះជាខ្លាំង ។
កូនក្រមុំនេះបានប្រាប់ AFP តាមទូរស័ព្ទថា៖ «ទោះបីមានទឹកជំនន់ ឬមេឃភ្លៀងយ៉ាងណា ក៏គ្មានអ្វីអាចបញ្ឈប់ខ្ញុំបានឡើយ ។ អ្នកគ្រាន់តែបានរៀបការម្តងប៉ុណ្ណោះ តើអ្នកនឹងត្រូវពន្យារពេលវាដែរ ឬទេ? ខ្ញុំកំពុងរៀបមង្គលការជាមួយបុរសជាទីស្រលាញ់របស់ខ្ញុំ វាជារឿងដ៏សំខាន់ណាស់ ។ ឈុតអាពាហ៍ពិពាហ៍របស់ខ្ញុំត្រូវសើមជោគ ហើយធ្ងន់ ប៉ុន្តែ ខ្ញុំបានប្រាប់ខ្លួនឯងថា វាគឺហាក់ដូចជាខ្ញុំកំពុងនៅលើកម្រាលព្រំក្រហមអីចឹង» ។
នាងបន្តថា៖ «ពួកយើងពុំចង់កំណត់ពេលវេលាថ្មីទេ ព្រោះពួកយើងមានការព្រួយបារម្ភរួចទៅហើយ ដែលទីក្រុងរបស់យើងពិតជាងាយរងគ្រោះដោយទឹកជំនន់មែន» ។ «គ្មានរថយន្តចង់ជូនពួកយើងទៅព្រះវិហារទេ ដូច្នេះហើយទើបខ្ញុំជិះទូក ។ យើងមិនរំពឹងថា មានមនុស្សច្រើនទេ ដែលនៅតែអាចមានវត្តមាននៅទីនេះ និងសូម្បីលើកទឹកចិត្តពួកខ្ញុំដូច្នេះនោះទេ» ៕ ចន្ទី (nextshark)
