ប្រទេសកូរ៉េខាងត្បូង និងកូរ៉េខាងជើង កាលពីថ្ងៃច័ន្ទម្សិលមិញនេះ បានព្រមព្រៀងគ្នាធ្វើជំនួបកំពូលរវាងមេដឹកនាំនៃប្រទេសទាំងពីរ នៅទីក្រុងព្យុងយ៉ាង ក្នុងកញ្ញាខាងមុខនេះ។
ការព្រមព្រៀងគ្នា បានកើតឡើងបន្ទាប់ពីមានកិច្ចប្រជុំកំរិតខ្ពស់កាលពីពេលថ្មីៗនេះ នៅតំបន់ Panmunjom ប៉ុន្តែពួកគេមិនទាន់បានបញ្ជាក់ពីបរិច្ឆេទលំអិតនៅឡើយនោះទេ។
សូមបញ្ជាក់ថា មេដឹកនាំកូរ៉េខាងជើង និងកូរ៉េខាងត្បូងធ្លាប់ជួបគ្នាចំនួន ២លើករួចមកហើយ ក្នុងខែមេសា និងឧសភា ហើយប្រសិនជាកិច្ចប្រជុំកំពូលនេះកើតឡើងដូចការព្រាងទុក វាជាជំនួបកំពូលលើកទី ៣របស់ពួកគេ។
នៅក្នុងកិច្ចប្រជុំថ្នាក់ខ្ពស់កាលពីថ្ងៃច័ន្ទម្សិលមិញនេះ ធ្វើឡើងបន្ទាប់ពីមានការព្រួយបារម្ភថា ដំណើរការលុបបំបាត់ចោលអាវុធនុយក្លេអ៊ែរហាក់នៅជាប់ឆ្អឹង ចាប់តាំងពីមានកិច្ចប្រជុំកំពូលរវាងមេដឹកនាំអាមេរិច និងកូរ៉េខាងជើង នៅប្រទេសសិង្ហបុរី។
ទីក្រុវ៉ាស៊ីនតោន និងព្យុងយ៉ាង បានចោទប្រកាន់គ្នាទៅវិញទៅមកថា រួញរាក្នុងការអនុវត្តនូវអ្វីដែលមេដឹកនាំរបស់ពួកគេបានព្រមព្រៀងគ្នានៅក្នុងកិច្ចប្រជុំកំពូលជាប្រវត្តិសាស។
អាមេរិចបានជំរុញឲ្យកូរ៉េខាងជើងពន្លឿនការលុបបំបាត់ចោលអាវុធនុយក្លេអ៊ែរ ខណៈកូរ៉េខាងជើងវិញបានជំរុញថា ដំណើរការលុបបំបាត់ចោលគួរតែត្រូវបានធ្វើជាដំណាក់កាល៕ សុភ័ក្ត្រ
