ខេត្តព្រះសីហនុ ៖ ប្រជាពលរដ្ឋ និងមន្ត្រីរាជការមានឋានៈទាប នៃរដ្ឋបាលខេត្តព្រះសីហនុ បង្ហាញការសង្ស័យ កាលបើ ឃើញមានសំណង់រឹងមាំមួយកន្លែង មានទីតាំង ស្ថិតក្នុងសង្កាត់លេខ៣ ខាងក្រោយអតីតរោងការ Ma Ma Center ក្បែរមាត់បឹងព្រែកទប់ ក្រុង-ខេត្តសៀមរាប ទំនងជាកំពុង់សង់រំលោភ ទៅលើដីចំណីផ្លូវសាធារណៈ។
ផ្តើមពីបញ្ហានេះ ទាំងប្រជាពលរដ្ឋ និងមន្ត្រីរាជការ ខេត្តព្រះសីហនុ បានសំណូមពរដល់មន្ទីរស្ថាប័នពាក់ព័ន្ធ ជាពិសេស លោក អ៊ី សុខឡេង អភិបាលក្រុងព្រះសីហនុ និង ឯកឧត្តម យន្ត មីន អភិបាលខេត្តព្រះសីហនុ ជួយបញ្ជូនមន្ត្រីជំនាញចុះពិនិត្យ និងមានវិធានការទប់ស្កាត់ឲ្យបានទាន់ពេល បើរកឃើញកំហុសឆ្គង។
ប្រភពពីជាពលរដ្ឋ បានអះអាងថា រាល់ថ្ងៃនេះ ឃើញសំណង់ដ៏ធំខាងលើនេះ ហាក់កំពុងសាងសង់ រំលោភចូលដីចំណីផ្លូវសាធារណៈ ហើយបើតាមកម្មករសំណង់និយាយ គឺសំណង់ខាងលើនេះ នឹងបន្តសង់ចេញមកខាងក្រៅប្រមាណ ១ម៉ែត្រ កន្លះ ទៀត។
ត្រង់ចំណុចនេះ ប្រភពព័ត៌មានពីប្រជាពលរដ្ឋ និងមន្ត្រីរាជការមានឋានៈទាបមួយចំនួន បង្ហាញការសោកស្តាយថា បើអាជ្ញាធរមិនមានវិធានការ ឬចុះពិនិត្យទប់ស្កាត់សំណង់ ដែលសង្ស័យកំពុងសង់រំលោភលើដីសាធារណៈខាងលើ ឲ្យបានទាន់ពេលទេ សំណង់នេះ នឹងធ្វើឲ្យប៉ះពាល់ដល់ប្រយោជន៍ជនរួមជាតិ និងសង់បំពានច្បាប់យ៉ាងគឃ្លើនថែមទៀតផង៕ ដោយ៖ ដែន សីមា
