ខេត្តស្វាយរៀង ៖ លោក តូច ប៉ូលីវ៉ា អភិបាលរងខេត្តស្វាយរៀង តំណាងលោកអភិបាលខេត្ត នៅព្រឹកថ្ងៃអង្គារ ៣កើត ខែស្រាពណ៍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៤ ខែសីហា ឆ្នាំ២០១៨នេះ នៅសាលប្រជុំសាលាខេត្ត បានដឹកនាំកិច្ចប្រជុំផ្សព្វផ្សាយដីកាស្តីពីការបង្កើតគណៈកម្មការវាយតម្លៃ និងការទទួលស្គាល់អង្គភាពផ្តល់សេវាសាធារណៈគំរូក្នុងវិស័យអប់រំ និងវិស័យសុខាភិបាល និងចែកសម្ភារប្រើប្រាស់ (កុំព្យូទ័រយួរដៃចំនួន៥០គ្រឿង) ដល់តំណាងមន្ទីរមុខងារសាធារណៈខេត្ត មន្ទីរសេដ្ឋកិច្ច និងហិរញ្ញវត្ថុខេត្ត មន្ទីរអប់រំ យុវជន និងកីឡាខេត្ត មន្ទីរសុខាភិបាលខេត្ត មន្ទីរបរិស្ថានខេត្ត អភិបាលក្រុង ស្រុកទាំង៨ ប្រធានការិយាល័យអប់រំ យុវជន និងកីឡា ក្រុង ស្រុកទាំង៨ លោកនាយកវិទ្យាល័យទាំង១៩ទូទាំងខេត្ត លោកប្រធានស្រុកប្រតិបត្តិ ទាំង៤(ស្វាយរៀង. ជីភូ. រមាសហែក និងស្វាយទាប) និងមន្ទីរពេទ្យបង្អែកទាំង៥ ក្នុងខេត្ត (CPA1, CPA2, CPA3) សម្រាប់យកទៅអនុវត្តការងារប្រលងប្រណាំង អង្គភាពផ្តល់សេវាសាធារណៈគំរូ ។
កិច្ចប្រជុំនេះមានការអញ្ជើញចូលរួមពី លោកជាសមាជិកក្រុមប្រឹក្សាខេត្ត លោកនាយករងរដ្ឋបាលសាលាខេត្ត លោកនាយកទីចាត់ការគ្រប់គ្រងធនធានមនុស្ស ទីចាត់ការហិរញ្ញវត្ថុសាលាខេត្ត លោកអភិបាល និងសមាជិកក្រុមប្រឹក្សា ក្រុង ស្រុក ទាំង៨ លោក លោកស្រី ប្រធាន អនុប្រធាន មន្ទីរពាក់ព័ន្ធ លោកប្រធានការិយាល័យអប់រំ យុវជន និងកីឡា ក្រុងស្រុកទាំង៨ លោកប្រធានស្រុកប្រតិបត្តិ ទាំង៤(ស្វាយរៀង ជីភូ រមាសហែក និងស្វាយទាប) លោកប្រធានមន្ទីរពេទ្យបង្អែកទាំង៥ និងលោកនាយកវិទ្យាល័យទាំង១៩ ក្នុងខេត្ត ។
មានប្រសាសន៍ក្នុងកិច្ចប្រជុំនេះ លោកអភិបាលរងខេត្ត បានបញ្ជាក់ថា អនុក្រឹត្យ លេខ៥៤ អនក្រ.បក និងប្រកាសអន្តរក្រសួង (លេខ២៤៨២ មស.ប្រក និងលេខ២៤៨១ មស.ប្រក) មានវិសាលភាពអនុវត្តចំពោះគ្រឹះស្ថានសាធារណៈ ដែលជាអង្គភាពផ្តល់សេវាសាធារណៈទៅលើវិស័យសាធារណៈអប់រំ និងវិស័យសុខាភិបាល ការបង្កើតប្រព័ន្ធដែលមានកម្រិតស្តង់ដា និងមានវិជ្ជាជីវៈសម្រាប់ធ្វើការវាយតម្លៃអង្គភាពផ្តល់គំរូ ដែលទាមទារឲ្យគ្រប់អង្គភាពពាក់ព័ន្ធត្រូវខិតខំប្រឹងប្រែង និងយកចិត្តទុកដាក់ផ្ដោតលើការអនុវត្តឲ្យបានខ្លាំងក្លា ។
ក្នុងន័យដើម្បីចូលរួមចំណែកជំរុញការអនុវត្តកិច្ចការនេះឲ្យមានដំណើរការទៅដោយរលូន ប្រសិទ្ធភាព និងទទួលបានលទ្ធផលល្អប្រសើរនាពេលខាងមុខ ឯកឧត្ដមអភិបាលរងខេត្ត ក្នុងនាមឯកឧត្ដមអភិបាលខេត្ត ក៏បានធ្វើការផ្ដាំផ្ញើនូវចំណុចសំខាន់ៗមួយចំនួន ដូចខាងក្រោម ៖
១-ត្រូវរៀបចំ និងកែលម្អក្របខ័ណ្ឌការងារ ដោយមានផែនការសកម្មភាព និងបញ្ជីសូចនាករគន្លឹះពាក់ព័ន្ធដើម្បីគាំទ្រ(បណ្តុះបណ្តាល) តាមដាន និងវាយតម្លៃ។
២-សិក្សាអំពីស្ថានភាពបច្ចុប្បន្នរបស់អង្គភាពផ្តល់សេវាសាធារណៈទាំងពីរវិស័យនេះ ដោយបណ្តុះបណ្តាលបុគ្គលិក ការផ្លាស់ប្តូររបៀបរបបការងារ ការផ្លាស់ប្តូរផ្នត់គំនិត និងរៀបចំផែនការអភិវឌ្ឍន៍ស្ថាប័នរបស់ខ្លួន។
៣-បន្តសិក្សាអំពីហានិភ័យ ការគ្រប់គ្រងការផ្លាស់ប្តូររបៀបរបបការងារ ទំនាក់ទំនងការងារ ការទទួលខុសត្រូវរបស់បុគ្គលិក និងការប្រើប្រាស់ប្រាក់រង្វាន់លើកទឹកចិត្តឲ្យមានប្រសិទ្ធភាព ៕វ៉ៃកូ