នេះជាខណៈពេលដ៏ស្លុតរន្ធត់មួយ ដែលបុរសម្នាក់ប្រដាប់ដោយកាំភ្លើង បានដកភ្ជង់ និងបាញ់សម្លាប់យ៉ាងសាហាវ ទៅលើបុរសជាម្នាក់នៅលើដងផ្លូវ បន្ទាប់គាត់បានឈប់រថយន្តអែបចិញ្ចើមផ្លូវ និងចុះទទួលយកកូនស្រីរបស់គាត់ចេញពីក្នុងរថយន្ត ។
តាមរយៈវីដេអូពីកាមេរ៉ាសន្តិសុខ បានបង្ហាញឲ្យឃើញរថយន្ត១គ្រឿង បានឈប់អែបនឹងចិញ្ចើមផ្លូវមួយ ។ បន្ទាប់មក បុរសម្នាក់ដែលត្រូវបានដឹងថាជាមេធាវីឈ្មោះ André Ribeiro អាយុ ៤៦ ឆ្នាំ បានចុះពីរថយន្ត និងដើរទៅកាន់ទ្វារក្រោយ ដើម្បីទទួលយកកូនស្រីរបស់គាត់ ពីស្ត្រីម្នាក់ដែលសន្និដ្ឋានថាអាចជាដៃគូ ឬ ជាអ្នកមើលថែកូនស្រីរបស់គាត់ ។
បន្ទាប់ពីទទួលយកកូនស្រីពុំទាន់បានប៉ុន្មានផង ស្រាប់តែបុរសម្នាក់បានបង្ហាញខ្លួនប្រដាប់ដោយកាំភ្លើង ភ្ជង់ទៅលើគាត់តែម្តង ។ ដោយបានដឹងសភាពការណ៍ដ៏ប្រឈមនឹងគ្រោះថ្នាក់បែបនេះ គាត់បានប្រគល់កូនស្រីរបស់គាត់ទៅឲ្យស្រី្តម្នាក់នោះ ដើម្បីទុកឲ្យគាត់ត្រូវប្រឈមមុខតែម្នាក់ឯង ។ ភ្លាមៗបន្ទាប់ពីប្រគល់កូនស្រីឲ្យមានសុវត្ថិភាព ជនដៃដល់ក៏ចាប់ផ្តើមបាញ់ប្រហារគាត់ពីក្រោយ បណ្តាលឲ្យស្រុតជង្គង់ទៅនឹងដីសន្សឹមៗ មុនពេលស្លាប់គួរឲ្យអាសូរ ។
ឃាតករនេះសូម្បីពុំបានផ្តល់ពេលវេលាគ្រប់គ្រាន់ សម្រាប់ស្ត្រី និងកូនស្រីតូចនោះ ដកថយទៅកាន់ទីកន្លែងសុវត្ថិភាពនោះទេ មុនពេលបាញ់ប្រហារទៅលើលោក Riberio ចំនួន ៥ គ្រាប់ មុនពេលគេចខ្លួនពីកន្លែងកើតហេតុ ។
មកទល់ពេលនេះ មូលហេតុនៃការបាញ់សម្លាប់មេធាវីរូបនេះ នៅតែពុំដឹងច្បាស់នៅឡើយ ប៉ុន្តែ The Sun បានរាយការណ៍ថា ប៉ូលីសជឿថា វាជាករណីចេតនាធ្វើឃាត ជាជាងអំពើប្លន់ ព្រោះគ្មានរបស់របរអ្វីដែលត្រូវបានបាត់បង់ ៕ ឧត្តម (mirror.co.uk)