ប្រធានាធិបតីហ្វីលីពីន Rodrigo Duterte ស្រាប់តែប្រកាសថាលោកពិតជានឿយណាយនឹងយុទ្ធនាការកម្ចាត់មន្ត្រីពុករលួយ ហេតុនេះលោកអាចនឹងលាលែងពីតំណែង។
តាមគេហទំព័រ Newsweek នៅថ្ងៃ១៤ខែសីហា លោក Duterte បានលើកឡើងក្នុងសុន្ទរកថាមួយនាវិមានប្រធានាធិបតីថា៖ «ខ្ញុំចង់ឱ្យមនុស្សគ្រប់រូបដឹងថា ខ្ញុំកំពុងគិតអំពីការលាលែងពីមុខតំណែង ព្រោះខ្ញុំនឿយហត់ណាស់។ ខ្ញុំមិនបានខឹងអ្នកណាទេ។ សង្គ្រាមរបស់ខ្ញុំក្នុងការប្រឆាំងនឹងអំពើពុករលួយ ការស៊ីសំណុកសូកប៉ាន់ គ្មានពេលនឹងត្រូវបញ្ចប់នោះទេ»។
ប្រធានាធិបតីរូបនេះបានធ្វើការកត់សម្គាល់បន្ថែម៖ «អំពើពុករលួយបានធ្វើឱ្យមានស្នាមកខ្វក់នៅតាមស្ថាប័ន និងការិយាល័យរបស់រដ្ឋាភិបាលស្ទើរតែទាំងអស់»។
សេចក្ដីប្រកាសខាងលើត្រូវបានលើកឡើងមួយថ្ងៃបន្ទាប់ពីលោក Duterte បានបណ្ដេញមន្ដ្រីយោធា២០រូប ដែលសង្ស័យថាបានប្រព្រឹត្តអំពើពុករលួយចេញពីមុខតំណែង។
មុននោះ លោកDuterte អាយុ៧៨ឆ្នាំ ធ្លាប់បាននិយាយដល់ពីលទ្ធភាពលាលែងពីមុខតំណែងមុនពេលបញ្ចប់អាណត្ដិ៦ឆ្នាំ របស់ខ្លួនដែលចាប់ផ្ដើមតាំងពីឆ្នាំ២០១៦មក។
នៅខែកុម្ភៈ ឆ្នាំ២០១៨ ប្រធានាធិបតីហ្វីលីពីន បានប្រកាសថា លោកនឹងលាលែងពីមុខតំណែងនៅឆ្នាំ២០២០។ពេលនោះលោកបានពោលថា៖ ខ្ញុំអាយុច្រើនហើយ ។ ខ្ញុំពុំមានមហិច្ឆតាទេ។ខ្ញុំប្រាកដជាចង់សម្រាក»៕
សូយន