ប្រសិនបើចិនលង់ខ្លួនក្នុងសង្គ្រាមពន្ធដារជាមួយអាមេរិកដូចក្នុងពេលបច្ចុប្បន្ននេះ នោះចិននឹងអស់«គ្រាប់»សម្រាប់បាញ់តបតនឹងអាមេរិក។ប្រាកដណាស់ ប្រទេសនេះនៅ«មានសន្លឹកបៀ»ផ្សេងទៀត។
ចិនបានត្រៀមបម្រុងនូវយុទ្ធសាស្ដ្រផ្សេងទៀតដើម្បីប្រឈមនឹងសង្គ្រាមពាណិជ្ជកម្មជាមួយអាមេរិកដែលកំពុងវិវឌ្ឍតឹងតែងឡើងៗ។ចិននឹងប្រើសន្លឹកបៀថ្មី នោះគឺការវាយលុកទៅលើក្រុមហ៊ុនយក្សរបស់អាមេរិកដែលកំពុងធ្វើសកម្មភាពនៅចិន។
តាមនោះ នៅដើមខែនេះ អត្ថបទមួយត្រូវបានចុះផ្សាយលើកាសែតប្រជាជន ដែលជាស្ថាប័នផ្លូវការរបស់បក្សកុម្មុយនិស្ដចិន ដោយនិយាយប្រយោលលើបញ្ហាថាចិននឹងវាយលុកបណ្ដាក្រុមហ៊ុនយក្ស របស់អាមេរិកកំពុងប្រតិបត្ដិការនៅប្រទេសនេះ។ ក្នុងនោះដែរ គេបានធ្វើការសន្និដ្ឋានអំពី Apple និមិត្ដរូបរបស់អាមេរិកលើទឹកដីចិន ។ អត្ថបទនេះបានធ្វើការ«ជំរុញ»ឱ្យចិនទាមទារឱ្យក្រុមហ៊ុនApple ចែករំលែកប្រាក់ចំណេញមួយចំនួនរបស់ខ្លួនឱ្យមកចិន។តាមរយៈនោះ ក្រុមហ៊ុននេះត្រូវមានសកម្មភាពជំរុញឱ្យរដ្ឋាភិបាលអាមេរិកមានដំណោះស្រាយជម្លោះពាណិជ្ជកម្មមួយសមស្រប។
ក្រុមហ៊ុនអាមេរិកដែលនឹងក្លាយជាគោលដៅបន្ទាប់ពី Apple មានជាអាទិ៍ United Technologies, Caterpillar, General Electric, Johnson & Johnson, Microsoft, IBM, Disney, Cargill, General Motors, Ford và Procter & Gamble ដែលសុទ្ធសឹងជា ក្រុមហ៊ុនមានប្រាក់ចំណូលគួរឱ្យកត់សម្គាល់នៅចិន ហើយពួកគេនឹងស្ថិតនៅក្នុងចន្លោះកណ្ដាលនៃជម្លោះពាណិជ្ជកម្មអាមេរិក-ចិន។
យ៉ាងនេះក្ដី ប្រសិនបើក្រុងប៉េកាំងសម្រេចធ្វើបែបនេះ វាគឺជារឿង«កាំបិតមុខពីរ»។ ព្រោះថាប្រសិនបើក្រុមហ៊ុនធំៗទាំងនោះទ្រាំទ្រលែងបាននឹងសម្ពាធនយោបាយ ពួកគេអាចជ្រើសរើសយកការដកថយចេញពីទីផ្សាររបស់ចិន។ បែបនេះពុំប្រាកដថាចិនមិនមានផលវិបាកនោះទេ ព្រោះថាក្រៅពីបាត់បង់ចំណូល កម្មករចិនក៏នឹងបាត់បង់ការងារផងដែរ៕
សូយន
