បន្ទាប់ត្រូវបានបង់ប្រាក់ធានានៅក្រៅឃុំ ព្រោះប្រព្រឹត្តហិង្សាលើភរិយា Duane Youd បានទៅព្រលានយន្តហោះ ហើយបើកបរយន្តហោះមកបំបុកផ្ទះរបស់ខ្លួន ។
RT ឲ្យដឹងថា អ្នកបើកបរយន្តហោះឯកជន Duane Youd អាយុ ៤៧ឆ្នាំ នៅរដ្ឋ Utah (អាមេរិក) បានបើកយន្តហោះខ្នាតតូចមកបំបុកផ្ទះរបស់ខ្លួន បន្ទាប់ពីកើតជម្លោះខ្លាំងៗនឹងភរិយា ។
ប៉ុន្តែ Yout ត្រូវបានបង់ប្រាក់ធានាឲ្យនៅក្រៅឃុំ ។ បុរសរូបនេះក៏ទៅព្រលានយន្តហោះ Spanish Fork- Springville ស្ថិតនៅចម្ងាយពីផ្ទះរបស់ខ្លួនប្រមាណ ២៤គីឡូម៉ែត្រ ដើម្បីបើកយន្តហោះមក…បុកផ្ទះរបស់ខ្លួន ។
ករណីនេះកើតឡើងវេលាម៉ោង ២និង៣០នាទី ថ្ងៃទី ១៣ ខែសីហា (ម៉ោងតំបន់) នៅ Payson ដែលជាទីក្រុងតូច១ មានពលរដ្ឋប្រមាណ ២០.០០០នាក់ប៉ុណ្ណោះ ។
Yout ស្លាប់នៅនឹងកន្លែង ក្នុងពេលដែលភរិយានិងកូនស្រី មានសំណាងរួចផុតពីការស្លាប់ទោះបីយន្តហោះនេះបានបុកចំផ្ទះ ២ជាន់រសប់ពួកគេ ហើយបង្កទៅជាអគ្គិភ័យក្តី ។
សមត្ថកិច្ចសន្និដ្ឋានថា Yout ជាអ្នកបើកបរជើងចាស់ ហេតុនេះទង្វើបើកបុកចំផ្ទះពុំមែនជារឿងចៃដន្យទេ ។
គេនៅពុំទាន់ដឹងពីមូលហេតុនាំឲ្យ Yout ធ្វើនូវទង្វើអត្តឃាតទាំង “គ្រួសារ” តាមរបៀបនេះនៅឡើយទេ! ៕ ចន្ទ្រា