ខេត្តកំពង់ស្ពឺ៖ ប្រជាពលរដ្ឋចំនួន៣៥គ្រួសារ រស់នៅភូមិបាក់ជញ្ជៀន ឃុំត្រពាំងគង ស្រុកសំរោងទង ខេត្តកំពង់ស្ពឺ បានចោទទីតាំងកសិដ្ឋានចិញ្ជឹមជ្រូកមួយកន្លែងនៅមូលដ្ឋាននេះ ថាបានបំពុលបរិស្ថានធ្ងន់ធ្ងរដល់ការរស់នៅ របស់ប្រជាពលរដ្ឋ។
ក្រុមប្រជាពលរដ្ឋបានអះអាងថា កសិដ្ឋានចិញ្ចឹមជ្រូកខាងលើនេះ បានបង្កក្លិនស្អុយខ្លាំង ចេញពីលាមកជ្រូក ធ្វើឲ្យប្រជាពលរដ្ឋ ពិបាកទ្រាំ ក្នុងការរស់នៅប្រចាំថ្ងៃ ព្រោះតែកសិដ្ឋាននោះ នៅកៀកភូមិប្រជាពលរដ្ឋរស់នៅ។
ប្រជាពលរដ្ឋ បន្តថា ម្ចាស់កសិដ្ឋានចិញ្ចឹមជ្រូកខាងលើ គឺមិនធ្វើទៅតាមការបទដ្ឋានបច្ចេកទេសត្រឹមត្រូវទេ ដោយលាមកសត្វជ្រូកទាំងនោះ ត្រូវបានបង្ហូរចូលតាមប្រឡាយសាធារណៈ។ ហើយថា ម្ចាស់កសិដ្ឋាននោះពុំបានគិតដល់ផលប៉ះពាល់ដល់អ្នកជិតខាងនោះទេ។ កន្លងមកករណីខាងលើនេះ ប្រជាពលរដ្ឋ ធ្លាប់បានដាក់ពាក្យប្តឹងទៅប្រធានការិយាល័យបរិស្ថានស្រុកសំរោងទង ខេត្តកំពង់ស្ពឺ ឲ្យជួយអន្តរាគមន៍ដែរ ហើយខាងមន្ត្រីជំនាញក៏ចុះទៅត្រួតពិនិត្យ និងឲ្យម្ចាស់កសិដ្ឋានខាងលើ ធ្វើកិច្ចសន្យាបញ្ឈប់សកម្មភាពចិញ្ចឹមជ្រូកបែបនេះទៀត ប៉ុន្តែត្រូវម្ចាស់កសិដ្ឋានឈ្មោះ ពិន ពិនន្ត នៅតែបន្តចិញ្ចឹមនៅទីតាំងដដែល ហើយខាងជំនាញក៏ស្ងាត់បាត់ឈឹងជាច្រើនខែមកហើយមិនឃើញមានវិធានការអីបន្តទៀត ។
បញ្ហានេះដែរ លោក ឯម សុគន្ឋ ប្រធានមន្ទីរបរិស្ថាន ខេត្តកំពង់ស្ពឺបានឲ្យដឹងថា លោកនឹងបញ្ជូនមន្ត្រីចុះទៅពិនិត្យទៅដល់ទីតាំងនោះម្តងទៀត។
លោកបន្តថា សម្រាប់កសិដ្ឋានដែលនៅជាប់ភូមិប្រជាពលរដ្ឋ ធ្វើក៏ធ្វើចុះប៉ុន្តែត្រូវធ្វើតាមបច្ចេកទេសឲ្យបានត្រឹមត្រូវ ពោលគឺត្រូវសំអាតបំបាត់ក្លិនស្អុយ ឲ្យបានជាប្រចាំ ដើម្បីកុំមានក្លឹនប៉ះពាល់ដល់អ្នកជិតខាង និងកុំឲ្យប៉ះពាល់ដល់ធនធានធម្មជាតិ និងជីវៈចំរុះផងដែរ។
ទោះជាបែបនេះក្តី មិនទាន់មានប្រភពទាក់ទង លោក ពិន ពិនន្ត ម្ចាស់កសិដ្ឋានចឹញ្ចឹមជ្រូក ដែលត្រូវប្រជាពលរដ្ឋក្នុងមូលដ្ឋានខាងលើ រិះគន់ ដើម្បីស្នើការបំភ្លឺបានទេ នៅថ្ងៃទី១៦ ខែសីហា ឆ្នាំ២០១៨នេះ៕ ដោយ៖ ដែន សីមា
