ខណៈដែលប៉ូលីសថៃនៅសប្តាហ៍នេះ បានទទួលដីកាចាប់ខ្លួនបុរសឈ្មោះ Anuwat Chaipha ដែលជាប្អូនប្រុសបង្កើតរបស់ជនសង្ស័យជាឃាតករឈ្មោះ Assaya Chaipha ក្នុងករណីចោទប្រកាន់បានជួយ Assaya រួចផុតពីការចាប់ខ្លួននោះ មេបញ្ជាការនៃនាយកដ្ឋានប៉ូលីសក្រុង ៤ លោកឧត្តមសេនីយ៍ Theerapong Wongratthapitak កាលពីថ្ងៃពុធ (១៥ សីហា) បានសច្ចាថា ការប្រមាញ់ចាប់ខ្លួនបុរសទាំងពីរនឹងត្រូវតែបន្ត ។
លោក Theerapong បានបន្ថែមថា ប៉ូលីសនឹងធ្វើការទំនាក់ទំនងជាមួយមន្ត្រីប្រទេសជិតខាង ដើម្បីជួយកំណត់ទីតាំងលាក់ខ្លួនរបស់បងប្អូនប្រុសទាំងពីរនេះដែលសមត្ថកិច្ចត្រូវការចាំបាច់ ។
ដីកាចាប់ខ្លួនសម្រាប់ Anuwat ត្រូវបានចេញកាលពីថ្ងៃទី១៣ ខែសីហា ។
កាលពីដើមខែនេះ បុរសម្នាក់ដែលមានរូបរាងដូច Assaya អាយុ ៣៣ ឆ្នាំ ត្រូវបានជឿថាត្រូវបានគេប្រទះឃើញនៅក្នុងវីដេអូ CCTV ចាកចេញពីជណ្តើរយន្តសណ្ឋាគារមួយនៅក្នុងប្រទេសកម្ពុជា ជាមួយដៃគូប្រុសម្នាក់ ដែលគេជឿថាជាបងប្រុសរបស់គាត់ ។
ភស្តុតាងមួយទៀតបានបង្ហាញថា Assaya ដែលត្រូវបានគេរាយការណ៍ថា ជាមនុស្សញៀនល្បែង បានគេចខ្លួនទៅកាន់ប្រទេសកម្ពុជា គឺពិតថាជាឃាតករ ដែលរថយន្ត Mercedes-Benz E220 របស់ជនរងគ្រោះ ក្រោយមកត្រូវបានរកឃើញនៅក្នុងស្រុកព្រំដែន Pong Nam Ron នៃខេត្ត Chanthaburi ។
អ្នកជំនួញវ័យ ៣៩ ឆ្នាំ Thitima Tangwibulphanit ដែលជាម្ចាស់ក្រុមហ៊ុនអចលនទ្រព្យ, ដឹកជញ្ជូន និងស្ថានីយប្រេងឥន្ធនៈ៣កន្លែង ត្រូវបានរកឃើញត្រូវបានគេសម្លាប់នៅក្នុងសណ្ឋាគារមួយ នៅក្នុងសង្កាត់ Lad Prao នៃទីក្រុងបាងកក កាលពីថ្ងៃទី៣០ កក្កដា ។
សាកសពរបស់ Thitima ត្រូវបានរកឃើញនៅក្បែរគ្រែដេករបស់នាង នៅក្នុងបន្ទប់សណ្ឋាគារ ទីកន្លែងដែលនាងត្រូវបានគេជឿថា បានស្នាក់នៅរយៈពេល១ខែ ជាមួយ Assaya ដែលបានជាជំនួយការរបស់នាង ។ លលាដ៏ក្បាលរបស់នាងត្រូវបានវាយប្រហារ ហើយបេហ្ស៍ប័លប្រឡាក់ទៅដោយឈាម ក៏ត្រូវបានរកឃើញនៅក្បែរនោះផងដែរ ។
វីដេអូពីកាមេរ៉ាសុន្តិសុខសណ្ឋាគារ ទីកន្លែងដែលសាកសពរបស់នាងត្រូវបានរកឃើញ បានបង្ហាញឲ្យឃើញថា Thitima និង Assaya បានវិលត្រឡប់ចូលសណ្ឋាគារវិញនៅវេលាម៉ោង ១០ និង ៤១ នាទីយប់ថ្ងៃទី២៦ ខែកក្កដា ប៉ុន្តែ Assaya បានចាកចេញពីបន្ទប់តែម្នាក់ឯងនៅវេលាម៉ោង ១ និង ៥៥ នាទីព្រឹកថ្ងៃទី២៧ ខែកក្កដា ៕ ឧត្តម (ប្រភព៖ The Nation, kapook)