កាសែតទាំងធំទាំងតូចនៅអាមេរិកបានព្រួតដៃគ្នាសរសេរចុះផ្សាយ នៅថ្ងៃព្រហស្បតិ៍នេះ បានឆ្លើយវាយបកទៅលោកប្រធានាធិបតី Donald Trump ថា “កាសែតពុំមែនជាសត្រូវរបស់ប្រជាជននោះទេ” និងថា អ្នកដែលនិយាយដូច្នេះទៅវិញទេដែលជាគ្រោះថ្នាក់សម្រាប់ប្រទេសជាតិ។
កាសែត The New York Times វិញ បានសរសេរថា ការដែលហៅអ្នកកាសែតជាសត្រូវរបស់ប្រជាជន គឺជារឿងមួយដ៏គ្រោះថ្នាក់សម្រាប់ជីវិតនៃលទ្ធិប្រជាធិបតេយ្យ។ The New York Times ក៏បានស្រង់សម្តីអតីតប្រធានាធិបតី Ronald Reagan ហាក់ដូចជាចង់ដាស់តឿនលោកTrumpថា ការអនុវត្តសេរីភាពភាពបញ្ចេញមតិរបស់កាសែត គឺគ្រឹះដ៏សំខាន់របស់លទ្ធិប្រជាធិបតេយ្យ។ កាសែត The New York Times ដ៏ធំនេះ បានចេញផ្សាយការស្ទង់មតិរបស់ពលរដ្ឋអាមេរិក ឲ្យដឹងថា មានពលរដ្ឋអាមេរិក៩០ភាគរយដែលជាអ្នកស្រឡាញ់បក្សប្រជាធិបតេយ្យ យល់ថា សេរីភាពរិះគន់របស់កាសែត គឺជាសារសំខាន់ដែលធានាសុវត្ថិភាពរបស់សេរីភាពនោះឯង។
លោក Ken Paulson អតីតអ្នកសរសេរបទវិចារណកថា ឲ្យកាសែត USA Today បានបញ្ចេញយោបល់ ដោយលោកមិនគិតថា អ្នកកាសែតអាចទ្រាំអង្គុយមើលបុរសដ៏មានអំណាចម្នាក់លើលោក រំលាយសិទ្ធិសេរីភាពដែលបានត្រូវធានាដោយរដ្ឋធម្មនុញ្ញអាមេរិកបាននោះទេ។ ដូច្នេះអ្នកកាសែតត្រូវតែធ្វើកិច្ចការសរសេររិះគន់របស់ពួកគេតទៅទៀត។
កាសែត The Arizona Daily Star ទំនងជាបានដំឡើងសម្តីធ្ងន់បន្តិចដែរ ដោយសរសេរឡើង ថា បើអ្នកកាសែតមិនសរសេររិះគន់ ហើយទៅចូលរួមសន្និសីទ ចាំតែអង្គុយស្តាប់របាយការណ៍នៃកិច្ចប្រជុំដ៏សែនធុញទ្រាន់ របស់រដ្ឋាភិបាល គឺមិនបាច់គួរធ្វើអ្នកកាសែតទេ។
រីឯសារព័ត៌មាន Boston Globe បានសរសេរពន្យល់ ហាក់ដូចជាចង់ខ្សឹបដាក់ត្រចៀកលោកDonald Trump ថា « ប្រព័ន្ធផ្សព្វផ្សាយពុំមែនជាត្រូវរបស់ប្រជាជននោះឡើយ»។ កាសែតនេះ បានយកឃ្លាដូច្នេះដាក់ជាចំណងជើងនៃអត្ថបតបទវិចារណកថារបស់ខ្លួនតែម្តង៕
សូយន