ការវិវឌ្ឍសភាពការណ៍ស្មានមិនដល់មួយនៅថ្ងៃទី១៦ ខែសីហារដ្ឋការចិនបានប្រកាសនឹងបង្កើតប្រតិភូជាន់ខ្ពស់ទៅអាមេរិក ដើម្បីចរចាពាណិជ្ជកម្មនៅសប្ដាហ៍ខាងមុខ ខណៈពេលដែលសង្គ្រាមពាណិជ្ជកម្មរវាងមហាអំណាចសេដ្ឋកិច្ចទាំងពីរកាន់តែមានភាពតានតឹងឡើង។
តាម CNBC ប្រតិភូជាន់ខ្ពស់របស់ចិនដឹកនាំដោយរដ្ឋមន្ដ្រីពាណិជ្ជកម្មWang Shouwen នឹងទៅដល់អាមេរិកនាចុងខែ សីហានេះ ដើម្បីចរចាជម្លោះពាណិជ្ជកម្មជាមួយអាមេរិក។
ភាគីអាមេរិកនឹងដឹកនាំដោយអនុរដ្ឋមន្ដ្រីក្រសួងហិរញ្ញវត្ថុទទួលបន្ទុកពាណិជ្ជកម្មអន្ដរជាតិ David Malpas គឺជាអ្នកដឹកនាំកិច្ចចរចា។
ក្រសួងពាណិជ្ជកម្មចិនប្រកាសថា ក្រុងប៉េកាំងនឹងមិនទទួលយករាល់វិធានការដោះស្រាយបែបឯកតោភាគីណាមួយ ប៉ុន្ដែស្វាគមន៍ការចរចា។
គួររម្លឹកថា សង្គ្រាមពាណិជ្ជកម្មនេះបានផ្ទុះឡើងក្រោយពេលដែលអាមេរិកនិងចិនពុំអាចស្វែងរកបាននូវចម្លើយរួមចំពោះ ចំណោទពាណិជ្ជកម្មជាច្រើន។អតិរេកពាណិជ្ជកម្មរវាងអាមេរិកនិងចិនដែលមានកំណើនកើនឡើងពីមួយឆ្នាំទៅមួយឆ្នាំត្រូវបានចាត់ទុកជាមូលហេតុចម្បងបណ្ដាលឱ្យមានសង្គ្រាមពាណិជ្ជកម្មនេះ។
អាមេរិកចង់ឱ្យចិនមានសកម្មភាពធ្វើយ៉ាងណាកាត់បន្ថយអតិរេកពាណិជ្ជកម្មនេះ ប៉ុន្ដែក្រុងប៉េកាំងមិនអាចឬមិនចង់ធ្វើរឿងនេះ៕
សូយន
