លោកទេសរដ្ឋមន្ត្រី បានសន្យាផ្តល់ម៉ូតូមួយគ្រឿងដល់សិស្សវិទ្យាល័យនៅស្រុកកោះធំ ដែលប្រឡងជាប់ ទទួលបាននិទ្ទេស A និងសិស្សដែលប្រឡងជាប់ ទទួលបានប្រាក់រង្វាន់លើកទឹកចិត្តចំនួន១០ម៉ឺនរៀល ជាពិសេសស្វែងរកអាហារូបករណ៍ ពីសាកលវិទ្យាល័យនានា នៅក្នុងស្រុកផ្ដល់ជូនសិស្សក្នុងស្រុកកោះធំ និងនាំក្មួយៗសិស្សានុសិស្ស ដែលបានប្រឡងជាប់ ជិះរថភ្លើងពីភ្នំពេញទៅកំពង់ឆ្នាំង ដើម្បីស្វែងយល់ពី ការរីកចម្រើនរបស់ប្រទេសជាតិផងដែរ។
ថ្ងៃព្រហស្បតិ៍ ទី១៦ ខែសីហា ឆ្នាំ២០១៨ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានក្រុមការងារថ្នាក់ជាតិចុះជួយស្រុកកោះធំ បានអញ្ជើញជា អធិបតីក្នុងពិធីសំណេះសំណាល ជាមួយសិស្សថ្នាក់ទី១២នៃវិទ្យាល័យទាំង៤ ឋិតក្នុងស្រុកកោះធំ ខេត្តកណ្ដាល ដោយមានការចូលរួមពីលោកប្រធាន និងអនុប្រធានការិយាល័យអប់រំស្រុក លោកគ្រូ អ្នកគ្រូ និងសិស្សានុសិស្សថ្នាក់ទី១២នៃវិទ្យាល័យទាំង៤ សរុបប្រមាណ៧៩២នាក់។
សូមជម្រាបជូនថា៖ ការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០១៧-២០១៨ នឹងប្រព្រឹត្ត ទៅនៅថ្ងៃទី២០ ខែសីហា ឆ្នាំ២០១៨ខាងមុខនេះ ដែលក្នុងនោះនៅស្រុកកោះធំមានមណ្ឌល ប្រឡង ចំនួនបីរួមមាន៖ វិទ្យាល័យហ៊ុន សែនស្អាង(ជើង) វិទ្យាល័យហ៊ុន សែនស្អាង (ត្បូង) និងវិទ្យាល័យ វឌ្ឍនៈឈូងលាភ។
ថ្លែងទៅកាន់អង្គពិធីទាំងមូល លោកទេសរដ្ឋមន្ត្រី ស៊ុន ចាន់ថុល បានផ្ដាំផ្ញើឱ្យសិស្សានុសិស្សទាំងអស់ ខិតខំប្រឹងប្រែងរៀនសូត្រ ដើម្បីយកចំណេះទាំងនេះមកបម្រើប្រទេសជាតិ របស់យើង និងបានគូសបញ្ជាក់ ថា៖ ចំណេះវិជ្ជាជាទ្រព្យមានតម្លៃមិនអាចកាត់ថ្លៃបាន ស្របតាមសុភាសិតខ្មែរមួយឃ្លាពោលថា៖ “ចំណេះវិជ្ជាជាទ្រព្យដ៏ចំណាន ចោរលួចមិនបាន ចាយច្រើនរឹតតែចម្រើនឡើង”។
លោកទេសរដ្ឋមន្ត្រី បានបន្ថែមទៀតថា៖ រាជរដ្ឋាភិបាលដឹកនាំដោយ សម្ដេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ត្រូវការអ្នកចេះដឹងពិតប្រាកដបន្ថែមទៀតដើម្បីជួយ អភិវឌ្ឍលើគ្រប់វិស័យ ក្នុងគោលបំណងប្រែក្លាយពីប្រទេស កំពុងអភិវឌ្ឍទៅជាប្រទេសអភិវឌ្ឍជឿនលឿន ដូចបណ្តាប្រទេសអភិវឌ្ឍមួយចំនួន លើសកលលោក។
លោកទេសរដ្ឋមន្ត្រី ស៊ុន ចាន់ថុលក៏បានក្រើនរំឭកផងដែរ ឱ្យក្មួយៗសិស្សានុសិស្សទាំងអស់តាំងចិត្តឱ្យ មុតស្រួច ស្វែងរកគ្រប់មធ្យោបាយ ប្រើឱ្យអស់សមត្ថភាព និងសក្ដានុពលរបស់ខ្លួន ពិសេសរំឭកមេរៀនឱ្យ បានញឹកញាប់ ថែរក្សាសុខភាពឱ្យបានល្អ មុនពេលថ្ងៃប្រឡងមកដល់ និងបានជូនពរឱ្យពួកគាត់ប្រឡង ជាប់គ្រប់ៗគ្នា ជាពិសេសទទួលបាននិទ្ទេស A ឱ្យបានច្រើនជាងឆ្នាំមុនៗ៕ ដោយ ៖ កូឡាប