ភ្នំពេញ ៖ លោក នួន ផារ័ត្ន អភិបាលរងសាលារាជធានីភ្នំពេញ បានថ្លែងថា ក្នុងសម័យប្រឡងសញ្ញាបត្រមធ្យមសិក្សាទុតិយភូមិ នៅថ្ងៃទី២០ និងថ្ងៃទី២១ នៅមណ្ឌលភ្នំពេញ សាលារាជធានីភ្នំពេញ នឹងដាក់កម្លាំងនគរបាល គ្រប់តាមដងផ្លូវសំខាន់ៗទាំងអស់ ជាពិសេសផ្លូវចេញចូលទៅមណ្ឌលប្រឡង ទាំង២៥ នៅរាជធានីភ្នំពេញ ចាប់ពីម៉ោង៥ព្រឹកតទៅ ដោយសារបេក្ខជនប្រឡង នៅរាជធានីភ្នំពេញទាំងអស់ មានចំនួនជាង២ម៉ឺននាក់។
ក្នុងកិច្ចប្រជុំស្តីពីការរៀបចំសន្តិសុខសណ្តាប់ធ្នាប់ នៅថ្ងៃប្រឡងបាក់ឌុប នាថ្ងៃទី១៧ ខែសីហា នេះ នៅសាលារាជធានីភ្នំពេញ លោកនួន ផារ័ត្ន អភិបាលរងរាជធានីភ្នំពេញ បានមានប្រសាសន៍ថា “អាជ្ញាធររាជធានីភ្នំពេញ បានត្រៀមកម្លាំងសមត្ថកិច្ចគ្រប់គ្រាន់ ដើម្បីការពារសន្តិសុខ សណ្តាប់ធ្នាប់ និងសុវត្ថិភាព ជូនដល់បេក្ខជនប្រឡងសញ្ញាបត្រមធ្យមសិក្សាទុតិយភូមិ នៅថ្ងៃទី២០ និង២១ ខែសីហា ដើមសប្តាហ៍ក្រោយនេះ”។
លោក ជា ជាតិ អនុរដ្ឋលេខាធិការក្រសួងអប់រំ យុវជន និងកីឡា ថ្លែងថា “នេះជាលើកទី៥ ហើយ ដែលក្រសួងអប់រំ ធ្វើកំណែទម្រង់ នៃការប្រឡងមធ្យមសិក្សាទុតិយភូមិ ដែលមានអ្នកសង្កេតការណ៍ ចូលរួមតាមគ្រប់សកម្មភាព របស់បេក្ខជនប្រឡង ។ ចំពោះកំណែទម្រង់នៃការប្រឡងទាំង៤ លើកកន្លងទៅ គឺទទួលបានជោគជ័យ។
លោក អនុរដ្ឋលេខាធិការ បានឲ្យដឹងថា មណ្ឌលប្រឡងនៅរាជធានីភ្នំពេញ មានចំនួន២៥ មណ្ឌល គិតជាបន្ទប់ប្រឡង មានចំនួន៩១៣បន្ទប់ ដែលមានបេក្ខជនប្រឡងចំនួន ២២.៧៧៨នាក់។ លោក បានស្នើឲ្យគ្រប់ស្ថាប័នពាក់ព័ន្ធ និងសមត្ថកិច្ចត្រូវបន្ដកិច្ចសហការ គាំទ្រ ដើម្បី ធ្វើការសម្របសម្រួល បេក្ខជន ក្នុងអំឡុងពេលប្រឡងសញ្ញាបត្រសិក្សាទុតិយភូមិ ឆ្នាំនេះប្រព្រឹត្តទៅទទួលបានភាពល្អប្រសើរ។
លោក ឃាង សេង អនុប្រធានអង្គភាពប្រឆាំងអំពើពុករលួយ បានស្នើឲ្យអាជ្ញាធររាជធានីភ្នំពេញ ចូលរួមការពារសន្តិសុខសណ្តាប់ធ្នាប់ ២៤ម៉ោង លើ២៤ម៉ោង នៅតាមមណ្ឌលប្រឡងទាំងអស់ និងការពារសុវត្ថិភាព នៅមណ្ឌលទាំង១០កន្លែង នៅរាជធានីភ្នំពេញរហូត ដល់ថ្ងៃទី២៩ ខែសីហា ឆ្នាំ២០១៨។ ចំពោះអ្នកសង្កេតការណ៍ សម្រាប់មណ្ឌលប្រឡង នៅរាជធានីភ្នំពេញ លោក ឃាង សេង ឲ្យដឹងថា គឺអង្គការភាពដាក់អ្នកសង្កេតការណ៍ស្មគ្រចិត្ត ចំនួន១.១១៤នាក់ ទូទាំង២៥មណ្ឌលប្រឡង។
លោកលើកឡើងថា គ្រប់បេក្ខជនប្រឡងទាំងអស់ និងអ្នកពាក់ព័ន្ធនានា បើធ្វើឲ្យបែកធ្លាយវិញ្ញាសាជាសាធារណៈ គឺជាប់ទោសព្រហ្មទណ្ឌ ហើយបើមានការបែកធ្លាយវិញ្ញាសាមែននោះ អង្គភាពប្រឆាំងអំពើពុករលួយ នឹងបើកការស្រាវជ្រាវ ស៊ើបអង្កេតឃាត់ខ្លួន ជនល្មើស ឲ្យខាងតែបាន។ ភាពសម្ងាត់ នៃវិញ្ញាសាប្រឡង ជារឿយៗ ACU និងក្រសួងអប់រំ តែងតែដាស់តឿនឲ្យបេក្ខជនប្រឡង អ្នកសង្កេតការណ៍ មេប្រយោគ គ្រូអនុរក្ស និងអ្នកពាក់ព័ន្ធនានា ហាមដាច់ការថតវិញ្ញាសា និងការរក្សាភាពសម្ងាត់នៃវិញ្ញាសា ដែលសូម្បីតែការថតរក្សាទុកផ្ទាល់ខ្លួន ក៏មិនអនុញ្ញាតឲ្យថតដែរ ហើយអ្នកថតនោះ បើចាប់បាន ក៏ត្រូវមានទោសដូចគ្នា៕ ដោយ ៖ បញ្ញាស័ក្តិ