តាម Denver7 ចុះផ្សាយនោះ បុរសម្នាក់រស់នៅ Frederick, Colorado ឈ្មោះ Chris Watts អាយុ៣៣ឆ្នាំ នៅថ្ងៃទី ១៤ ខែសីហាកន្លងទៅថ្មីនេះ បានប្រញាប់ប្រញាល់ ស្ទុះស្ទាររាយការណ៍ប្រាប់ប៉ូលិសពីករណីបាត់ខ្លួនភរិយាឈ្មោះ Shanann អាយុ ៣៤ឆ្នាំ កំពុងមានគភ៌ ១៥សប្តាហ៍ និងកូនស្រីអាយុ ៣ឆ្នាំ Bella និងកូនស្រីម្នាក់ទៀតអាយុ ៤ឆ្នាំ ឈ្មោះ Celeste ។
ហេតុការណ៍នេះបានទាក់ទាញចំណាប់អារម្មណ៍របស់អាមេរិកទាំងមូល ។ ក្នុងកិច្ចសម្ភាសន៍ជាមួយ NBC’s Today Show កាលពីថ្ងៃពុធ (១៥/៨) ឈ្មោះ Chris បង្ហាញភាពឈឺចាប់ឥតគណនា ហើយអង្វករឲ្យអ្នកទាំងឡាយជួយស្វែងរកប្រពន្ធ និងកូនៗឲ្យគេផង ។
Shann Belle និង Celeste អ្នកទាំងអស់នៅទីណា មេត្តាវិលត្រឡប់មក!” Chris ស្រែកទាំងទឹកភ្នែក។ ប៉ុន្តែនៅពេលប៉ូលិសបើកសន្និសីទកាសែត ជាសាធារណៈបំណងសុំជំនួយព័ត៌មាន និងការជួយរុករក ព្រោះជនរងគ្រោះអាចជួបប្រទះនូវគ្រោះថ្នាក់ចៃដន្យ ស្រាប់តែប៉ុន្មានម៉ោងក្រោយមក ឈ្មោះ Chris បានឱនក្បាលសារភាពថា ខ្លួនជាអ្នកដៃដល់ សម្លាប់គ្រួសារទាំងមូល! ។
ប៉ូលិសទីក្រុង Frederick បានចេញសេចក្តីប្រកាសផ្លូវការផ្សាយជាសាធារណៈថា ៖ ឈ្មោះ Chris Watts បានត្រូវចាប់ខ្លួន! ដោយពុំបញ្ជាក់លម្អិតរឿងរ៉ាវអ្វីទៀតទេ ។ ពេលនេះ “ឃាតករមុខស្រស់” បានឃុំឃាំងបណ្តោះអាសន្ននៅពន្ធនាគារមណ្ឌល Weld រង់ចាំការកាត់ទោស ។ ប៉ូលិស Colorado និង FBI កំពុងប្រឹងប្រែងស្វែងរកសាកសពរបស់ជនរងគ្រោះ ៕ ចន្ទ្រា
