ក្នុងដំណើរទស្សនកិច្ចនៅឆ្នេរសមុទ្រភាគបូព៌ារបស់កូរ៉េខាងជើងច្មីៗនេះ មេដឹកនាំ Kim Jong-un បានរិះគន់បណ្ដាវិធានការដាក់ទណ្ឌកម្មរបស់ UN សំដៅមកលើប្រទេសខ្លួនថាវាពុំខុសប្លែកអ្វីពីអំពើឆក់ប្លន់នោះទេ។
តាមទីភ្នាក់ងារសារព័ត៌មានផ្លូវការ KCNA នៅថ្ងៃទី១៧សីហា លោក Kim និងភរិយា Ri Sol-ju អមដំណើរដោយមន្ត្រីជាន់ ខ្ពស់មួយចំនួនទៀតបានចុះពិនិត្យមើលការដ្ឋានសំណង់នៅតំបន់ទេសចរណ៍ឆ្នរសមុទ្រ។ក្នុងជំនួបជាមួយនឹងក្រុមកម្មករសំណង់ លោកKim បានសម្ដែងការខឹងសម្បាចំពោះបណ្ដាវិធានការដាក់ទណ្ឌកម្មរបស់អន្តរជាតិនិងចោទប្រកាន់អានុភាពបច្ចាមិត្ដដែល មានចេតនាចង់សម្លាប់ពលរដ្ឋកូរ៉េខាងជើងតាមរយៈបណ្ដាវិធានការដាក់ទណ្ឌកម្មនិងបង្កកទ្រព្យសម្បត្ដិដែលមិនខុសពីអំពើឆក់ប្លន់នោះទេ។
លោកKim នៅបានសង្កត់ធ្ងន់ថា ប្រសិនបើគ្រោងការណ៍សាងសង់តំបន់ទេសចរណ៍Wonsan-Kalmaទទួលបានជោគជ័យក្នុងស្ថានភាព ដ៏លំបាកដូចពេលនេះ វានឹងបង្ហាញឱ្យពិភពលោកឃើញម្ដងទៀតអំពីស្មារតីសាមគ្គីភាពរបស់បក្ស កងទ័ព និងប្រជាជនកូរ៉េខាងជើង។
តាមYonhap នោះគេកម្រឃើញមេដឹកនាំត្រកូលKim សម្ដែងឡើងនូវការធុញទ្រាន់ចំពោះវិធានការដាក់ទណ្ឌកម្ម និងបង្កកទ្រព្យសម្បត្តិរបស់អង្គការសហប្រជាជាតិ៕
សូយន