ស្វាយរៀង៖ លោកជំំទាវកិត្តិសង្ហបណ្ឌិត ម៉ែន សំអន សមាជិកាអចិន្ត្រៃយ៍នៃគណបក្សប្រជាជនកម្ពុជា និងជាប្រធានក្រុមការងារ CPP ចុះជួយខេត្តស្វាយរៀង រួមទាំងតំណាងរាស្ត្រជាប់ឆ្នោតជាច្រើនទៀត នៅព្រឹកថ្ងៃទី១៨ ខែសីហា ឆ្នាំ២០១៨នេះបានជួបសំណេះសំណាលជាមួយសមាជិក សមាជិកា និងប្រជាពលរដ្ឋ នៅខេត្តស្វាយរៀង ដើម្បីថ្លែងអំណរគុណដោយផ្ទាល់ជូនពួកគាត់ ដែលបានបោះឆ្នោតគាំទ្រផ្តល់ជ័យជំនះជូនគណបក្សប្រជាជនកម្ពុជា ដែលពិធីនេះបានប្រព្រឹត្តទៅនាសាលប្រជុំធំរបស់គណបក្សប្រជាជនកម្ពុជាខេត្តស្វាយរៀង។
បេក្ខជនតំណាងរាស្ត្រជាប់ឆ្នោតទាំង៥ របស់គណបក្សប្រជាជនកម្ពុជានោះរួមមានទី១៖ លោកជំំទាវកិត្តិសង្ហបណ្ឌិត ម៉ែន សំអន, ទី២៖ លោកស្រី ដួង វណ្ណា, ទី៣៖ លោកបណ្ឌិត ជ័យ សុន, ទី៤៖ លោកស្រី ឈុន សារឹម និង ទី៥ លោកស្រី ពៅ សុភាព។
នៅមណ្ឌលស្វាយរៀងនេះ មានអាសនៈចំនួន៥។ ខេត្តនេះមានប្រជាពលរដ្ឋប្រមាណ៨៧ភាគរយ បានទៅចូលរួមបោះឆ្នោត ក្នុងចំណោមប្រជាពលរដ្ឋដែលមានឈ្មោះក្នុងបញ្ជីជាង៣.៥សែននាក់។ គណបក្សប្រជាជនកម្ពុជា បានទទួលការគាំទ្រច្រើនលើសលប់ រហូតឈ្នះទាំង៥អាសនៈនៅក្នុងខេត្តនេះ។
តាមរបាយការណ៍របស់អាជ្ញាធរខេត្ត ការបោះឆ្នោតជាតិជ្រើសតាំងតំណាងរាស្ត្រ នីតិកាលពី០៦ នៅថ្ងៃទី២៩ ខែសីហា ឆ្នាំ២០១៨ កន្លងទៅក្នុងខេត្តស្វាយរៀង មានភាពល្អប្រសើរបង្ករលក្ខណៈងាយស្រួលដល់ប្រជាជនទៅចូលរួមបោះឆ្នោតបានទាន់ពេលវេលា ហើយសភាពការណ៍សន្តិសុខនយោបាយ សន្តិសុខសណ្តាប់ធ្នាប់សង្គមពុំមានអ្វីកើតឡើងគួរឱ្យគត់សម្គាល់នោះទេ នៅគ្រប់ការរិយាល័យទាំង៩៣៦ការិយាល័យ គឺបានដំណើរការប្រក្រតីរហូតដល់ចប់ការបោះឆ្នោត។
តាមលទ្ធផលផ្លូវការនេះ គណបក្សប្រជាជនកម្ពុជារបស់សម្តេចតេជោ ហ៊ុន សែន បានទទួលសំឡេងគាំទ្រច្រើនលើសលប់រហូតដល់៤,៨៨៩,១១៣សំឡេង ស្មើនឹងប្រមាណ ៧៧ភាគរយនៃសំឡេងសន្លឹកឆ្នោតបានការ ទាំងមូល៦,៣៦២,២៤១។ នៅគ្រប់បណ្តារាជធានី/ខេត្ត គណបក្សកាន់អំណាច ៥ អាណត្តិជាប់ៗគ្នានេះ ទទួលបានសំឡេងគាំទ្រនាំមុខគេដាច់ បើធៀបនឹងគណបក្សនយោបាយទាំង១៩ផ្សេងទៀត ដែលចូលរួមប្រកួតប្រជែងក្នុងការបោះឆ្នោត។
សូមបញ្ជាក់ថា លទ្ធផលផ្លូវការ នៃការបោះឆ្នោតជាតិជ្រើសតាំងតំណាងរាស្ត្រ នីតិកាលទី០៦ បានបង្ហាញទាំងស្រុង នៅវេលាម៉ោង៧និង៣០នាទីយប់ ថ្ងៃទី១៥ ខែសីហា ឆ្នាំ២០១៨ ដោយបញ្ជាក់ថា គណបក្សប្រជាជនកម្ពុជា ដែលជាបក្សកាន់អំណាច បានគ្រប់គ្រងអាសនៈទាំង១២៥ នៅក្នុងរដ្ឋសភា ចំណែកគណបក្សផ្សេងៗ ដែលចូលរួមក្នុងការបោះឆ្នោតពុំបានទទួលអាសនៈណាមួយឡើយ៕ វ៉ៃកូ