សណ្ឋាគារដ៏ល្បីឈ្មោះចំនួន ៣នៅក្នុងប្រទេសចិនបានបរាជ័យក្នុងការអនុវត្តប្រព័ន្ធអនាម័យ បន្ទាប់ពីបុគ្គលិករបស់ខ្លួន ត្រូវបានគេថតបាន ដោយយកច្រាស់ដុសបង្គន់យកទៅលាងកែវ អាងងូតទឹក និងកន្លែងផ្សេងៗក្នុងបន្ទប់សណ្ឋាគារ។
បន្ទាប់ពីមានការលួចថតបាន និងធ្វើការចែកចាយ ក្រុមឃ្លាំមើលការអនុវត្តប្រព័ន្ធសុវត្ថិភាពអនាម័យ ទេសចរណ៍ ចំណីអាហារ និងថ្នាំ ស្ថិតក្នុងខេត្ត Heilongjiang បានធ្វើការបញ្ជាក់ថា អ្នកស៊ើបអង្កេតបានធ្វើការស៊ើបអង្កេត និងបានសន្និដ្ឋានថាវីដេអូដែលថតបាននោះគឺជារឿងពិត ហើយសណ្ឋាគារក៏ទទួលបានការព្រមានផងដែរ ដើម្បីឲ្យប្រាកដថាមិនមានរឿងបែបនោះកើតឡើងទៀត។
សារពត៌មាន Beijing Youth Daily បានរាយការណ៍ថា អ្នកអនាម័យនៅសណ្ឋាគារ ៣រួមមានសណ្ឋាគារ Sheraton, Shangri-La និង Kempinski ត្រូវបានគេលួចថតបាន ដោយរំលោភស្តង់ដារអនាម័យសណ្ឋាគារ។
ចំនែកបុគ្គលិកអនាម័យនៅសណ្ឋាគារ Shangri-La និង Kempinski ត្រូវបានគេលួចថតបាន ដោយឃើញថា បានសំអាតកែវដោយច្រាស់ដុសបង្គន់ ព្រមទាំងប្រើប្រាស់កន្សែងពោះគោជ្រលក់ក្នុងទឹកបង្គន់ យកទៅលាងកំរាលផងដែរ។
បើតាមសេចក្តីរាយការណ៍ សណ្ឋាគារទាំងនោះមានតម្លៃស្នាក់នៅចន្លោះ ១០៥ ទៅ ៤១០ដុល្លាក្នុងមួយយប់៕ សុភ័ក្ត្រ
ប្រភព៖ scmp.com